Казанда кыштан соң юл тамгаларын яңартуга керештеләр

Маркировканың зур өлешен термопластик ярдәмендә төшерәчәкләр.

Фото: Денис Гордийко

(Казан шәһәре KZN.RU, 22 нче апрель). Казанда подрядчы оешмалар юл тамгасын яңарта башладылар. Алар Вишневский, Горький, Карл Маркс, Кремль, Сул як Болак, Уң як Болак, Островский, Профсоюз, Сәлимҗанов, Ташаяк, Назарбаев, Павлюхин, Декабристлар, Гагарин урамнарында, Ямашев проспектында һәм Беренче Май мәйданында маркировкалауга керешкәннәр.

Бүгенге көндә эшчеләр 9 мең кв.м юл өслегенә тамга төшергәннәр. 2022 елда юл эшләре программаларын гамәлгә ашыру кысаларында барлыгы 377 мең кв. метрдан артык мәйданда тамгалар ясау планлаштырыла. Яңа тамганың шактый өлеше – 280,7 мең кв. м, яки тамгалар яңартылачак гомуми мәйданның дүрттән өч өлеше, термопластик ярдәмендә башкарылачак.

Тышкы төзекләндерү комитетында билгеләп үтүләренчә, термопластикны төп магистральләрдә кулланачаклар, ә хәрәкәтнең интенсивлыгы азрак булган урамнарда махсус юл буявы белән төшерәчәкләр.

Шулай ук Казанда һәйкәлләрне җәйге сезонга әзерләү башланды. Шәһәрдә барлыгы 90 һәйкәл, обелиск һәм бюстларны тәртипкә китерәсе бар.