Казанда талпан тешләгәннән соң медицина ярдәме сорап меңнән артык кеше мөрәҗәгать иткән

Тулаем алганда, Татарстан буенча быел шикаятьләрнең саны 10%-ка кимегән.

Фото: Марат Мугинов

(Казан шәһәре KZN.RU, 29-нчы июль). Быел эпидемия сезонында талпаннар тешләү буенча медицина ярдәме сорап мөрәҗәгать итүчеләр саны 10,2%-ка кимегән. Табиблар 4260 кешене кабул иткән, узган ел – 4772 кеше. Казанда 1091 мөрәҗәгать теркәлгән. Белгечләр табигатькә чыгучыларның барысын да талпан энцефалитыннан вакцинацияләнергә чакыра.

Бакча-дача участокларында талпаннарны 43,45%-ы, урман массивларында – 25,9%, болыннарда – 15,8%-ы «эләктергән». Тагын 12,2% очракта талпаннар кешеләргә шәхси ярдәмче хуҗалыклар территориясендә һөҗүм иткән.

Агымдагы елда кешеләрдән алынган 1350 талпан тикшерелгән. Иксодлы талпан боррелиозы кузгатучы 344 очракта (зыян күрүчеләр санының 25,5%-ы) бүленгән, ә талпан энцефалитын кузгатучы – бер очракта. Бөҗәкләрне кеше өчен куркыныч башка инфекцияләргә дә тикшергәннәр.

Күп очракта тешләүләр саны кимү җәмәгать киңлекләрен эшкәртү белән бәйле. Исегезгә төшерәбез, Казан паркларында һәм скверларында талпанга каршы акарицид эшкәртү майда 176,6 гектар мәйданда башкарылды. Гомумән алганда, Татарстан буенча акарицид эшкәртү 1537,3 гектар мәйданда башкарылган, шуларның 605 гектары – җәйге савыктыру оешмаларында.

Талпан тешләүнең авыр нәтиҗәләрен профилактикалауның нәтиҗәле ысулы булып вакцинация тора. Татарстанда 7646 кеше талпан энцефалитына каршы иммунизация узган, шул исәптән 3897 бала.

Йогыш табигый шартларда булганлыктан, туристлык походларына, гөмбә җыюга, балыкка, ауга һәм башка шундый күңел ачуларга баручы һәркемгә вакцинацияләнергә тәкъдим ителә.

Талпан тешләгән очракта кичекмәстән медицина ярдәме сорап мөрәҗәгать итәргә кирәк. Әгәр андый мөмкинлек булмаса, талпанны мөстәкыйль алырга, тешләү урынын сабын белән әйбәтләп юарга кирәк. Алынган талпанны герметик ябылучы савытка ябып, Татарстан Республикасында Гигиена һәм эпидемиология үзәгенә түбәндәге адрес буенча тапшырырга кирәк: Сеченов урамы, 13а.

Анализ үткәрү тәртибе турында тулырак мәгълүматны түбәндәге телефон номерлары буенча алырга мөмкин: +7(843)221-79-12, +7(843)221-79-07, дип хәбәр итә Кулланучылар хокукларын яклау һәм кеше иминлеге өлкәсендә күзәтчелек федераль хезмәте.

Шулай ук укыгыз

Барлык яңалыклар