Казанда яңа ел төнендә җәмәгать транспорты 2:00 сәгатькә кадәр йөриячәк

1 нче гыйнварда автобуслар, трамвайлар һәм троллейбуслар линиягә 7:30 да чыгачак

Фото: Денис Гордийко

(Казан шәһәре KZN.RU, 25 нче декабрь, Диләрә Гафурова). ТР башкаласында яңа ел төнендә җәмәгать транспорты 2:00 сәгатькә кадәр эшләячәк. 1 нче гыйнварда автобуслар, трамвайлар һәм троллейбуслар маршрутларга 7:30 да чыгачак һәм эшләрен 23:30 да тәмамлаячак. Шәһәр Мэры Илсур Метшин җәмәгать транспорты эшчәнлеген контрольдә тотарга кушты. «Китәргә һәм килергә мөмкин булсын өчен, барлык предприятиеләр, муниципаль һәм коммерцияле ташучылар белән эш алып бару мөһим. Кадрлар белән катлаулылыклар бар, әмма бәйрәмнәр, бигрәк тә Яңа ел бәйрәмнәре, линияләрдәге күчмә составны киметергә сәбәп түгел», – диде ул.

Шәһәр Башкарма комитеты җитәкчесе урынбасары Илдар Шакиров сүзләренчә, яңа ел каникулларында шәһәр транспорты ял көне графигы буенча эшләячәк – 5:30 дан 23:30 га кадәр, метрополитен – 6:00 дән 0:00 гә кадәр.

7 нче гыйнварда, Раштуа бәйрәмендә, төнге гыйбадәттән соң «Үзәк стадион» тукталышына махсус транспорт бирү оештырылачак. 1:30 сәгатьтән пассажирларны 2 нче троллейбуслар һәм 6 нчы, 10а, 15 нче, 23 нче, 30 нчы номерлы автобуслар көтәчәк.

Илдар Шакиров, бәйрәм атмосферасын булдыру өчен, предприятиеләрнең күчмә составларны һәм метрополитен станцияләрен бизәүләре турында сөйләде. Транспорт салонында автоинформаторлар аша яңа ел котлаулары яңгырый, ә 45 нче һәм 46 нчы маршрут автобусларында «Казан автобусында Яңа ел тавышы бул» акциясендә җиңүчеләрнең котлауларын ишетергә мөмкин.

Спикер шулай ук 31 нче декабрьдән 8 нче гыйнварга кадәр урам-юл челтәре буйлап урнашкан муниципаль парковкаларның бушлай эшләячәген искәртте.

Барлык мәсьәләләр буенча Татарстан башкаласы халкы һәм кунаклары Транспорт комитетының кайнар линиясенә +7(843)275-30-50 телефоны буенча мөрәҗәгать итә ала.