Казанда авария хәлендәге юлларның 98,5% ы яңартылган

«Яшәү өчен инфраструктура» милли проекты кысаларында 12 юл участогының җидесе төзекләндерелгән

Казанда быел ремонт ясарга планлаштырылган авария хәлендәге барлык участоклар да ремонтланган диярлек. Аларга юл билгеләре, киртәләр, яктырту челтәрләре, ясалма тигезсезлекләр куелган, тамгалар һәм тавыш буйлары төшерелгән. Бу хакта бүген шәһәр Башкарма комитетында юл хәрәкәте куркынычсызлыгы буенча комиссия утырышында Казан Башкарма комитеты җитәкчесе урынбасары Игорь Куляжев сөйләде.

Бүгенге көнгә авария хәлендәге 68 участокның 67 участогында эшләр тулысынча башкарылган. Үтәлеш 98,5% тәшкил итә, дип хәбәр итте Игорь Куляжев. Бу участокларның барысында да юл билгеләре, куркынычсызлык коймалары, киртәләр урнаштыру, яктырту системалары, ясалма тигезсезлекләр булдыру, тамгалар һәм тавыш буйлары кую эшләре уңышлы төгәлләнгән.

Казан юлларында куркынычсызлыкны тәэмин итү өчен юл билгеләре ясыйлар һәм яңарталар. Бүгенге көнгә ул 331 мең кв.м мәйданда башкарылган, бу гомуми эш күләменең 80% ын тәшкил итә.

«Эшләр төп магистраль урамнарда термопластик кулланып һәм транспорт хәрәкәте азрак булган урамнарда буяулар кулланып башкарыла», — дип билгеләде Игорь Куляжев. Ул шулай ук хәбәр иткәнчә, шул ук максатлар өчен шәһәрдә 64 юл участогында 24 чакрымнан артык тышкы яктырту челтәрен урнаштыру каралган. Яктырту эшләре 26% ка тәмамланган.

«Яшәү өчен инфраструктура» милли проекты буенча юл эшләре тәмамланып килә. Проект кысаларында гомуми озынлыгы 7 км булган 12 юл участогын ремонтлау планлаштырыла. Бүгенге көнгә 7 объектта ремонт тәмамланган, калган биш объектта эшләр дәвам итә. Эшләр комплексында юл өлешләренең, тротуарларның асфальт-бетон өслеген, юл хәрәкәте иминлеге элементларын, юл билгеләрен, коймаларын, ясалма юл тигезсезлекләрен һәм башкаларны ремонтлау каралган.

Шулай ук проект кысаларында Достоевский урамындагы юлүткәргеч (эшләр 60% ка үтәлгән) һәм Болак елгасы аша күпер (эшләр 40% ка үтәлгән) ремонтлана.

Программага кермәгән юлларда чокырлар төзекләндерелә. Участоклар иң күп транспорт хәрәкәтеннән чыгып, шулай ук шәһәр районнары администрацияләре гаризалары буенча сайланды. Бүгенгә 30 мең километрдан артык мәйданда чокырлар 26% ка яңартылган.

«Хәзерге вакытта юл хәрәкәте иминлегенә юнәлтелгән барлык чаралар график нигезендә гамәлгә ашырыла һәм уку елы башланганчы тәмамланырга тиеш», – дип йомгаклады Игорь Куляжев.