Казанда дистанцион рәвештә ясалган караклык очракларының саны 70%-ка арткан

Милеккә каршы җинаятьләрнең гомуми саны 3795 тәшкил иткән, бу узган елның шул ук чоры белән чагыштырганда 15,8 процентка күбрәк.

(Казан шәһәре KZN.RU, 13-нче май). Казанда беренче квартал нәтиҗәләре буенча дистанцион рәвештә ясалган караклык очраклары саны 70%-ка арткан һәм 753 факт тәшкил иткән. Банк карталарыннан һәм счетларыннан акча урлау буенча җинаятьләр саны 83,3%-ка арткан һәм 636 очрак тәшкил иткән. Бу хакта милеккә каршы җинаятьләрне профилактикалау темасына багышланган ведомствоара киңәшмәдә билгеле булды.

Милеккә каршы җинаятьләрнең гомуми саны 3795 тәшкил иткән, бу узган елның шул ук чоры белән чагыштырганда 15,8 процентка күбрәк. Дистанцион җинаятьләр өлеше 24,1%-тан 36,6%-ка кадәр арткан. 1-нче апрельдән 20-нче апрельгә кадәр шәһәрдә 384 урлау очрагы теркәлгән, шул исәптән 91-е кибеттән һәм 142-се - банк счетларыннан.

Кибетләрдә һәм башка сәүдә нокталарында урлаулар саны өчтән бергә арткан - 373-дән 482 фактка кадәр. Шулай ук телекоммуникация технологияләрен кулланып кылынган җинаятьләр саны арткан, шул исәптән 83,3% - счетлардан һәм банк карталарыннан урлашу (347-дән 636 очракка кадәр) һәм 70%-ы - дистанцион рәвештә ясалган караклык очраклары (443-тән 753 очракка кадәр).

Шәһәр халкын төрле интернет-ресурсларны кулланганда игътибарлы һәм сак булырга, шикле сылтамалар буенча узмаска, үзләренең карталары турындагы мәгълүматларны ялган банк хезмәткәрләренә җиткермәскә чакыралар. Билгесез затлардан карталарны блоклау яки рөхсәт ителмәгән операцияләр турында хәбәр алганда, шик туган очракта, сөйләшүне тәмамларга һәм картада күрсәтелгән номер буенча банкка шалтыратырга кирәк.

Шулай ук укыгыз

Барлык яңалыклар