ТР Милли китапханәсе Казанда «Җиңү диктанты»ның төп мәйданчыгы булачак

Катнашучыларга 45 минут эчендә 25 сорауга тест форматында җавап бирергә туры киләчәк.

Фото: Денис Гордийко

(Казан шәһәре KZN.RU, 25 нче апрель). ТР Милли китапханәсе Казанда «Җиңү диктанты»н үткәрүнең төп мәйданчыгы булачак. Бөек Ватан сугышы темасына Халыкара тарихи диктант Татарстанда 27 нче апрельдә 198 ачык мәйданчыкта узачак.

Катнашучыларга тарих һәм хәрби тематика әсәрләре буенча белемнәрне күздә тоткан сорауларга җавап бирергә туры киләчәк. Диктант тест формасында узачак: җавапларның берничә вариантыннан дөресне сайларга кирәк була.

Быел акциягә Казанның барлык югары уку йортлары, ТР Милли китапханәсе, шулай ук «Татхимфармпрепаратлар», «Түбән Кама нефтехим», Казан дары заводы, хәрби частьләр һәм Росгвардия предприятиеләре кушылды, алар үз хезмәткәрләре өчен берничә ябык мәйданчык оештыралар.

Барлык мәйданчыкларда да «Җиңү волонтерлары» катнашачак. Тыл хезмәтчәннәре, сугыш балалары хөрмәтле кунаклар буларак катнашачак. Бүгенге көндә 216 ачык һәм ябык мәйданчык формалаштырылган, дип хәбәр итте ТР Архив эше буенча Дәүләт комитеты башлыгы Гөлнара Габдрахманова.

Катнашучыларны җыю һәм теркәү 10:00 сәгатьтә башланачак, аннары бланкларны тутыру буенча инструктаж уздырыла. Диктант 12:00 сәгатьтә башлана. Барлыгы 25 бирем булачак, аларга 45 минут эчендә җавап бирергә кирәк.

Акция «Бердәм Россия» партиясенең «Тарихи хәтер» федераль проекты кысаларында Татарстанның барлык шәһәр округларында һәм муниципаль районнарында үткәрелә.

Шулай ук укыгыз

Барлык яңалыклар