Казанда В.Груздев исемендәге 3 нче бала тудыру йорты янындагы сквер төзекләндерелде

Территориядә үсемлекләр утырттылар, радиаль эскәмия урнаштырдылар һәм өстәмә яктырту тоташтырдылар

Казанда Бутлеров һәм Толстой урамнары киселешендә В.Груздев исемендәге 3 нче бала тудыру йорты янындагы сквер төзекләндерелде. Эшләр «Торак һәм шәһәр мохите» милли проектының «Уңайлы шәһәр мохитен формалаштыру» федераль программасы буенча алып барылды.

Хирург Александр Вишневский һәйкәле янында яшеллек һәм өстәмә яктыртулы бердәм радиаль эскәмияле ял итү зонасы барлыкка килде. Гомуми мәйданы 325 кв.м булган территориядә дару үсемлекләре һәм куаклар, шул исәптән мәтрүшкә, бөдрә бөтнек, меңъяфрак, иссоп, дербенник, соры һәм япон спиреясы булган чәчәклекләр ясаганнар. Барлыгы 356 үсемлек утыртылган.

Белгечләр 248 кв.метрга брусчатка түшәгәннәр, чүп савытлары урнаштырганнар һәм киртәләрне яңартканнар – монда чуен коймалар барлыкка килгән, дип хәбәр итә Казан Башкарма комитетының Тышкы төзекләндерү комитеты.

Исегезгә төшерәбез, быел Татарстан башкаласында федераль программа буенча алты җәмәгать киңлеген төзекләндерәләр. Шул исәптән ТР төзелеш тармагы барлыкка килүнең 100 еллыгы скверы һәм Казан-2 тимер юл вокзалы янындагы сквер, Петров паркы, Зур Акчарлак күле һәм Серов урамындагы бульвар.

Шулай ук укыгыз

Барлык яңалыклар