Казанда 70 тукталыш яңа мәгълүмати табло белән җиһазландырылды

Таблолар шәһәрнең ун бистәсендә барлыкка килде.

(Казан шәһәре KZN.RU, 23-нче август). Казанда 70 тукталыш яңа мәгълүмати табло белән җиһазландырылды, алар ярдәмендә пассажирлар җәмәгать транспортының килү вакыты турында белә ала.

Шәһәрдәге барлык эре тукталыш пунктлары шундый таблоларга ия, хәзер алар белән шәһәрнең ерак районнарында һәм бистәләрендә урнашкан тукталыш мәйданчыклары да җиһазландырыла. Шулай итеп, мәгълүмати таблолар Казанның ун бистәсенең тукталыш пунктларында барлыкка килде: Залесный, Мирный, Константиновка, Иске Победилово, Петровский, Дәрвишләр, Кече Клыки, Олы Клыки, Ферма-2 һәм Борисково.

Бүген Казанда мәгълүмати таблолар белән җиһазландырылган 300-дән артык тукталыш бар. Аларның саны буенча Татарстан башкаласы Россия Федерациясенең эре шәһәрләре арасында әлеге күрсәткеч буенча лидер булып тора, дип хәбәр итә Транспорт комитеты.

Шуны да өстәп үтәргә кирәк, автобуслар, трамвайлар һәм троллейбусларның килү вакытын шулай ук «Яндекс.Транспорт» кушымтасы һәм kazantransport.ru транспорт порталы ярдәмендә күзәтергә мөмкин.

Шулай ук укыгыз

Барлык яңалыклар