Казанда Студентлар көнен «Хезмәт резервлары» стадионы шугалагында билгеләп үтәчәкләр

Хәзерге вакытта шәһәрдә югары һәм урта һөнәри уку йортларында 164 меңнән артык студент белем ала

Денис Гордийко фотосы

Казанда Студентлар көнен 25 гыйнварда «Хезмәт резервлары» стадионы шугалагында билгеләп үтәчәкләр. Шугалак территориясендә интерактив мәйданчыклар эшләячәк. Бу хакта бүген эшлекле дүшәмбе утырышында Казан муниципаль берәмлеге Башкарма комитетының Балалар һәм яшьләр эшләре комитеты рәисе Дмитрий Хвостиков сөйләде.

Шугалак территориясендә интерактив мәйданчыклар эшләячәк, анда студентлар спорт һәм уен биремнәрендә катнаша ала. Диджей Бабл Гам кичәнең хедлайнеры буларак чыгыш ясаячак. Программага шулай ук караоке һәм бию флешмоблары кертелгән.

Чараның партнерлары – «Сбербанк» гавами акционерлык җәмгыяте һәм «Самокат» хезмәте – биредә ял һәм актив чаралар зонасыны оештыра, анда килүчеләр татлы бүләкләр дә ала алачак.

Студентлар кичке 19:00 сәгатьтән 21:00 сәгатькә кадәр рәхәтләнеп бозда шуа ала. Бу вакыт аралыгында шугалакка керү һәм тимераякларны прокатка алу бушлай оештырыла.

Тимераякны бушлай прокатка алу өчен студент билетын, паспортны һәм «Сбербанк» гавами акционерлык җәмгыяте тарафыннан бирелгән махсус беләзекне күрсәтергә кирәк, аны стадион холлында әлеге банк хезмәтләрен тәкъдим итү ноктасында алырга була. Тимераяклар саны чикләнгән.

Бәйрәм чаралары шугалак белән генә чикләнеп калмый: 26 гыйнварда «УНИКС» концертлар залында Казан федераль университеты (КФУ) студентлары өчен махсус программа әзерләнә. 27 гыйнварда «Пирамида» мәдәни-күңел ачу комплексында «Ел студенты» республика премиясе җиңүчеләрен бүләкләү тантанасы уздырыла. Бу елгы бәйгедә 71 студент финалга чыккан.

Хәзерге вакытта Казанда югары һәм урта һөнәри уку йортларында 164 меңнән артык студент белем ала.