Казан Башкарма комитетында Филиппин Республикасының Россиядәге Илчелеге делегациясе белән очрашу узды

Яклар туризм, спорт һәм мәдәният өлкәләрендә хезмәттәшлек перспективалары турында фикер алышты.

Фото: Денис Гордийко

(Казан шәһәре KZN.RU, 22-нче октябрь, Алинә Бережная). Казанга эш визиты белән Филиппин Республикасының Россиядәге Илчелеге делегациясе килде, ул бүген Татарстан башкаласы Башкарма комитетында булды. Яклар туризм, спорт һәм мәдәният өлкәләрендә хезмәттәшлек перспективалары турында фикер алышты.

Шәһәр кунакларын Казанның Туризмны үстерү комитеты директоры Дарья Санникова сәламләде, ул ике якның да хезмәттәшлек итәргә һәм элемтәләрне җайга салырга теләвен билгеләп үтте.

Филиппин Республикасының Россия Федерациясендәге илчелеге эшләрендә вакытлы ышанычлысы Роберт О.Феррер Казанда беренче тапкыр булуын һәм кыска гына вакыт эчендә Татарстан башкаласының зур мөмкинлекләргә ия булуын бәяләве турында әйтте. Аның фикеренчә, Казан һәм Филиппин IT, туризм, спорт, мәдәният һәм башка юнәлешләрдә тыгыз хезмәттәшлек итә алыр иде. Роберт О. Феррер Казан һәм Филиппин партнерлар була алыр, дигән ышаныч белдерде

Казан шәһәре Думасы Аппаратының Халыкара һәм муниципальара элемтәләр идарәсе башлыгының беренче урынбасары Арсений Карякин хәбәр иткәнчә, бүгенге көндә Казанның 58 тугандаш шәһәре һәм партнеры бар. Ул ассызыклаганча, Татарстан башкаласы бөтен дөнья буенча шәһәрләр белән тыгыз хезмәттәшлек итә.

Очрашуда катнашучылар мәдәният өлкәсендә хезмәттәшлек турында фикер алыштылар. Аерым алганда, кунаклар Казанда ел саен үткәрелә торган зур чаралар белән кызыксынды. Шәһәр Башкарма комитетының мәдәният идарәсе җитәкчесе урынбасары Эмиль Мостафин ел саен күпсанлы кунаклар җыя торган татар халык бәйрәме Сабантуй турында сөйләде, моннан тыш, ул Бөтендөнья татар конгрессы ярдәме белән башка илләрдә дә үткәрелә. Делегация вәкиле Катерина Алпай шулай ук мәдәни алмашу белән кызыксынуын белдерде.

Очрашу ахырында Роберт О.Феррер Казан Башкарма комитеты вәкилләренә кунакчыллыклары өчен рәхмәт белдерде. Ул хезмәттәшлек турында конкрет тәкъдимнәр буенча фикер алышу өчен шәһәргә тагын бер тапкыр килү планнары белән уртаклашты.

Билгеләп үтик, бүген Филиппин Республикасының Россия Федерациясендәге илчелеге эшләренең вакытлы ышанычлысы Роберт О.Феррер белән Татарстан Республикасы Премьер-министрының беренче урынбасары Рөстәм Нигъмәтуллин очрашты.