Быел Казанның Совет районында алты яңа ишегалды спорт мәйданчыгы төзеләчәк

Районда спорт белән шөгыльләнү өчен барлыгы 249 универсаль мәйданчык бар

Фото: Денис Гордийко

Быел Казанның Совет районында алты яңа универсаль спорт мәйданчыгы урнаштырылачак. Бу хакта Казан Башкарма комитетында эшлекле дүшәмбедә район хакимияте башлыгы Роман Фәтхетдинов хәбәр итте.

Район башлыгы сүзләренә караганда, бүген Совет районында яшәүчеләрнең 68% даими рәвештә спорт белән шөгыльләнә. «Бу безнең дөрес юнәлештә баруыбызның күрсәткече, ә спорт безнең гражданнар өчен тормыш көнкүрешенә әверелә бара», – дип ассызыклады Роман Фәтхетдинов.

Хәзерге вакытта район территориясендә 249 универсаль мәйданчык эшли, алар, спорт һәркем шөгыльләнә алсын өчен, торак йортларга мөмкин кадәр якынрак урнашкан. Аерым алганда, якын арада яңа мәйданчык Чебакса бистәсендә төзеләчәк – ул җирле халыкны җәлеп итү үзәгенә һәм бистә бәйрәмнәрен уздыру мәйданчыгына әверелергә тиеш, дип ышана Роман Фәтхетдинов.

Исегезгә төшерәбез, узган ел районда тугыз яңа спорт объекты төзелгән иде инде.

Мәйданчыклар төзүдән тыш, «Ракета» стадионын яңарту да дәвам итә. Узган елда объектның фасады һәм трибуналары капиталь ремонтланган, шулай ук җылыту системасы һәм җылылык пунктлары яңартылган. Агымдагы елда стадионны төзекләндерү дәвам итәчәк.