Быел Казанда 34,6 км җылылык челтәре төзекләндерелә

Өч ел эчендә шәһәрдә 110 км чамасы челтәр яңартылган

2025 елда «Казан җылылык челтәрләре» 26 км җылылык челтәрен төзекләндерергә планлаштыра. Тагын 8,6 км челтәрне «Казэнерго» ремонтлаячак. Гомумән алганда, шәһәрдә җылылык белән тәэмин итү инфраструктурасы челтәрләренең 4% ы яңартылачак. Соңгы өч елда Казанда 109,9 км җылылык челтәре ремонтланган, бу аларның гомуми күләменең 15% ын тәшкил итә.

Эшләр 2023-2027 елларда Татарстан Республикасында коммуналь инфраструктура системаларын яңарту буенча төбәк программасы кысаларында территорияләрне үстерү федераль фонды ярдәмендә башкарыла.

Ягулыкара сезонда шулай ук Олонецкая урамындагы 5 нче йорт, Космонавтлар урамындагы 12 нче бина һәм Курчатов урамындагы 5 нче йорт адресы буенча «Казэнерго»ның өч казаны яңартылачак. Анда искергән казан өлешләрен һәм башка җиһазларны алыштырачаклар. Соңгы елларда шәһәрдә 26 котельный предприятиесе яңартылган, бу гомуми санның 21% ын тәшкил итә.

ТЭЦ-1дән «Горки» котельныйга кадәр 9,1 км озынлыктагы 5 нче магистраль җылылык үткәргеч төзелеше дәвам итә, аны төзүгә 413 млн сум тотылачак. Яңа объект җылылык белән тәэмин итү системасына 1,9 млн квадрат метрдан артык яңа торакны, 133 мең кв.м коммерция мәйданнарын, Гадел Кутуй, Даурия һәм Родина урамнарында төзеләчәк 12 мәктәп һәм 20 мәктәпкәчә учреждениене тоташтырырга мөмкинлек бирәчәк.

Челтәрләрне юу һәм пресслау эшләре кысаларында кайнар суны сүндерү графигы kzn.ru сайтында бастырыла, ресурслар белән тәэмин итүче оешмалар порталларында һәм «Ачык Казан» системасында, шулай ук йортларның мәгълүмат такталарында урнаштырыла.

Билгеләнгән вакытларга ярашлы, җылылык белән тәэмин итү объектлары, йортларның һәм социаль өлкә объектларының үзәк җылыту системалары өчен җылылык сезонына әзерлек паспортлары – 1 сентябрьгә кадәр, күпфатирлы торак йортлар өчен – 15 сентябрьгә кадәр, ә җылылык белән тәэмин итүче һәм җылылык челтәре оешмалары өчен 15 ноябрьдән дә соңга калмыйча алынырга тиеш.

Казанда 25 бердәм җылылык белән тәэмин итү оешмасы, 16 җылылык челтәре ширкәте, 127 «Казэнерго» котельныйлары, 59 идарә тармагы котельныйлары, 3 ТЭЦ һәм 3 район казаннары эшли, алар 16 меңнән артык кулланучыга хезмәт күрсәтә.

Шулай ук укыгыз

Барлык яңалыклар