«Йорт» экоүзәгендә күзәтүчесез хайваннар проблемасын хәл итү буенча эшче төркем утырышы узды

Очрашуда катнашучылар федераль законга үзгәрешләр кертү, «этләр исәбен алу» га әзерлек һәм башка мәсьәләләр буенча фикер алыштылар.

Фото: Денис Гордийко

(Казан шәһәре KZN.RU, 2-нче сентябрь). Кичә Казанның Горки-Әмәт урманындагы «Йорт» экоүзәгендә күзәтүчесез хайваннар проблемасын хәл итү буенча эшче төркем утырышы булды. Казан Мэры Илсур Метшин йөкләмәсе буенча эшче төркемне Башкарма комитет җитәкчесе урынбасары Искәндәр Гыйниятуллин җитәкли. Төркем составына Ветеринария академиясе ректоры Рөстәм Равилов, активистлар, зоояклаучылар, приют җитәкчеләре, ветеринарлар керде – алар барысы да август ахырында әлеге тема буенча түгәрәк өстәлдә катнашты.

Очрашуда катнашучылар «Хайваннар белән җаваплы мөгамәлә турында» федераль законга үзгәрешләр кертү турында фикер алыштылар, ул 2020 елда үз көченә керде. Закон этне тотуны, стерилизацияләүне, вакцинанацияләүне һәм элеккеге яшәү урыннарына чыгаруны күздә тота. Элегрәк И.Гыйниятуллин Мэр катнашында узган түгәрәк өстәлдә хайваннарга гуманлы мөнәсәбәт принципларының кертелүенә игътибарны юнәлтте, әмма аларны карап тотуның аерым мәсьәләләре эшләнмәгәнлегенә, хуҗаларның җаваплылыгы каралмаган булуына игътибарны юнәлтте. Закон үрчетүчеләрнең җайга салынмаган эшчәнлеген, шәһәрлеләрнең хайваннарына карата салкын мөнәсәбәт проблемасын хәл итми. Эш төркемендә катнашучылар якын арада федераль канунга үзгәрешләр кертү буенча үз тәкъдимнәрен эшли, алар әйтелгән проблемаларны хәл итәргә мөмкинлек бирер иде.

Очрашуда шулай ук этләрне вакцинацияләү һәм стерилизацияләү темасы буенча да фикер алыштылар. Казанда Мэр карары буенча майдан бушлай хайваннарны стерилизацияләү һәм вакцинацияләү уздырыла – мобиль пункт шәһәр бистәләренә чыкты. Ул эшли башлаганнан бирле 100-дән артык хайван стерилизацияләнгән һәм котыру авыруыннан 150-ләбе вакцинацияләнгән. Мобиль пункт эше октябрь башына кадәр дәвам итәчәк, шул ук вакытта белгечләр шәһәрнең төрле районнарына чыгачак. Эш төркемендә катнашучылар шәһәр халкына хайваннарны вакцинацияләүнең һәм стерилизацияләүнең мөһимлеге турында киң мәгълүмат бирү зарурлыгын билгеләп үттеләр, шулай ук бу эшкә шәхси ветеринария клиникаларын җәлеп итү мөмкинлеге турында фикер алыштылар.

Киңәшмәдә кагылган тагын бер тема «этләр исәбен алу» булды, ул йортсыз хайваннар санын билгеләргә мөмкинлек бирәчәк. Аны көз көне уздыру күздә тотыла, ә санауларны билгеле бер алгоритм буенча махсус математик модель ярдәмендә үткәрү планлаштырыла.

Эш төркемендә катнашучыларның очрашулары даими рәвештә үткәреләчәк.

Шулай ук укыгыз

Барлык яңалыклар