Чехов урамындагы йортта 40 фатир янгыннан соң яшәүчеләрнең кайтуына әзер

Күпчелек фатирларда электр бар

Фото: Казан шәһәре KZN.RU

(Казан шәһәре KZN.RU, 21 нче июнь). Чехов урамындагы 8/2 нче йортта янгыннан соң 40 фатир кулланышка әзер, аларның 22 сенә хуҗалар кайта башлаган. Калган фатирлар бишенче катта урнашкан, аларда торгызу эшләре дәвам итә.

Бүгенге көндә «Вахитов районы ИК» ҖЧҖ һәм «СК Эталон» ҖЧҖ көче белән барлык салкын су торбалары һәм 12 канализация стояклары торбалары алыштырылган. Эшләр фатирларга соң керү сәбәпле озакка сузылган. Шулай ук су белән тәэмин итү һәм су чыгару системалары тулысынча Федераль миграцион хезмәт идарәсе бинасында торгызылган. Әлегә 16 фатир канализациясез кала.

66 фатирның 58 ендә электр энергиясе бар – халык су җылыта, пешерә ала. Электр энергиясен тулысынча 23 нче июньгә кадәр, чыбыклар һәм фатир щитлары кипкәннән соң торгызырга планлаштыралар. Хәзер бишенче каттагы сигез фатирда электр энергиясе юк.

Газны әлегә бирү мөмкин түгел – түбә торгызылганнан соң эшчеләр вентиляция шахталарының башларын яңадан төзиячәкләр, аларсыз тарту булмаячак.

«СК Эталон» хезмәткәрләре җылыткычларны сүтеп, 1200 кв.м – 90 % мәйданлы беренче подъезддан дүртенче подъездга кадәр түбәне чистарттылар. 160 тонна янган түбә калдыклары чыгарылган.

Беренче һәм икенче подъездларда 360 м төтен чыгару һәм 720 м вентканал чистартылган, өченчесендә эшләр 70% ка башкарылган. Бүген дүртенче подъезддагы төтен чыгаргычларны чистартачаклар.

Проект оешмасы белән берлектә өченче һәм дүртенче подъездлар өстендә түбә узелларын монтажлау проекты эшләнгән. Эшләрне башлау өчен төзелеш материалы – 10 куб агач материал һәм ике паллет кирпеч китерелгән. Беренче подъезд өстендә түбә урнаштыру өчен терәк конструкцияне монтажлау башланган.

Йортны торгызу белән 21 эшче шөгыльләнә, шул исәптән түбә буенча белгечләр, сантехниклар, электриклар, балта осталары һәм мич чыгаручылар. Биш махсус техника берәмлеге җәлеп ителгән, алар арасында автокран, самосвал, бортлы КамАЗ.

Исегезгә төшерәбез, 14 нче июньдә Чехов урамындагы йортта янгын чыкты, аның нәтиҗәсендә түбә һәм чорма тулысынча янып бетте, түбәсен яңадан торгызырга туры киләчәк. 7 нче июльгә йортта төп ремонт эшләре тәмамланырга тиеш. Казан Мэры Илсур Метшин төзүчеләр алдында шундый бурыч куйды.

Шулай ук укыгыз

Барлык яңалыклар