Балалар бакчаларын, мәктәпләрне һәм хастаханәләрне җылылык белән тәэмин итү яңартылды

Киләсе тәүлектә «Казэнерго» тарафыннан хезмәт күрсәтелә торган 100 социаль учреждениене җылыту планлаштырыла

Фото: Денис Гордийко

Татарстан башкаласында температура фоны сизелерлек түбәнәю сәбәпле, социаль учреждениеләрне – балалар бакчаларын, мәктәпләрне һәм дәвалау учреждениеләрен җылылык белән тәэмин итү яңартылды. «Казэнерго» котельныйларына тоташтырылган 50 ләп социаль объект хәзерге вакытта җылытыла. Алдагы тәүлектә тагын 100 социаль учреждениегә җылылык җибәрү планлаштырыла, дип хәбәр итте Казан Башкарма комитеты җитәкчесе урынбасары Искәндәр Гыйниятуллин.

«Салкыннар башлану белән бәйле рәвештә, гидрометеоүзәкнең алдагы атнага фаразын исәпкә алып, социаль өлкә учреждениеләренә – балалар бакчаларына, мәктәпләргә, хастаханәләргә җылылык бирүне яңарту турында карар кабул ителде. Хәзерге вакытта бу эш башкарыла. «Казан җылылык челтәрләре» һәм «Казэнерго» учреждениеләр җитәкчеләреннән гаризалар җыя», – диде ул.

Искәндәр Гыйниятуллин сүзләренә караганда, гаризалар булганда, Авиатөзелеш, Яңа Савин, Киров һәм Мәскәү районнарының барлык социаль объектлары, шулай ук «Азино» һәм «Горки» район котельныйларына тоташкан учреждениеләр җылылык белән тәэмин ителергә мөмкин. Шул ук вакытта «Татэнерго» тарафыннан хезмәт күрсәтелүче барлык учреждениеләрне дә җылытып булмаячак, чөнки «ТЭЦ-1»дә ремонт эшләре инде башланган. «Казан җылылык челтәрләре» исә 425 социаль объектка (220 балалар бакчасы, 127 мәктәп, 78 дәвалау учреждениесе) хезмәт күрсәтә.

Торак йортларга җылылык бирү мәсьәләсе идарәче компанияләргә кергән гаризалар саныннан чыгып хәл ителәчәк. Исәпләү приборлары белән җиһазландырылган йортларда җылылык өчен түләү фактта күпме тотылганнан чыгып исәпләнәчәк. «Исәпләү приборлары урнаштырылмаган йортларда яшәүчеләр май аенда түләү алмаячак, чөнки җылылык өчен түләү норматив буенча сентябрьдән апрельгә кадәр сигез ай дәвамында тигез өлешләргә бүлеп исәпләнә», – дип билгеләп үтте Казан Башкарма комитеты җитәкчесе урынбасары.

Республиканың Гидрометеоүзәге фаразлавынча, иртәгә, 4 нче майда, һава температурасы урыны белән -5 градуска кадәр төшәчәк. 5 нче май төнендә термометр баганалары -4 градусны күрсәтәчәк. Юлларда урыны белән бозлавык барлыкка килергә мөмкин. Киләсе атнаның беренче яртысында Татарстанда катнаш характердагы явым-төшемнәр белән салкын һава торышы саклана.

Казанда җылылык белән тәэмин итү сезоны 20 нче апрельдә тәмамланды, ул 198 көнне тәшкил итте. Биш көн дәвамында тәүлеклек уртача һава температурасы +8 градустан югары булса, күпфатирлы йортларга һәм социаль учреждениеләргә җылылык бирү туктатыла.

Шулай ук укыгыз

Барлык яңалыклар