Дәрвишләр поселогында балалар поликлиникасы төзелеше тәмамлана

Якын арада медицина учреждениесен технологик җиһазлар белән җиһазландыра һәм территорияне төзекләндерә башлаячаклар.

Фото: ТР Сәламәтлек саклау министрлыгының Сәламәтлек саклау идарәсе

(Казан шәһәре KZN.RU, 16 нчы март). Казанның Дәрвишләр бистәсендә балалар поликлиникасы төзелеше тәмамлана. Эшләр «Сәламәтлек саклау» илкүләм проекты кысаларында алып барыла. Объект быелның II кварталында тапшырылыр дип көтелә.

Медицина учреждениесе төзелеше 2022 елның апрелендә башланды. Хәзерге вакытта эчке бизәү эшләре тәмамлануга якынлаша. Тиздән балалар поликлиникасын технологик җиһазлар белән җиһазландыра һәм территорияне төзекләндерә башлаячаклар.

Медицина учреждениесендә уңайлы көтү зоналары, заманча медицина җиһазлары һәм көндезге стационар каралган. Монда травматология пункты да ачылачак. Дәрвишләр поселогында һәм күрше торак массивларда яшәүче балаларга ярдәм күрсәтеләчәк, дип хәбәр итә ТР Сәламәтлек саклау министрлыгының Казан буенча Сәламәтлек саклау идарәсе.

6,4 мең кв.метр мәйданлы биш катлы бина сменасына 180 кешегә исәпләнгән булачак. Медицина учреждениесе заманча амбулатор педиатрия өчен кирәкле барлык әйберләр белән җиһазландырылачак. Поликлиникада 245 хезмәткәр – педиатрлар һәм тар профильле табиблар эшләячәк дип планлаштырыла.

Исегезгә төшерәбез, сентябрьдә төзелеш мәйданчыгында шәһәр Мэры Илсур Метшин булды.

Шулай ук укыгыз

Барлык яңалыклар