Инвалидлар декадасында Казанда бушлай кино күрсәтүләр уздырылачак

Шәһәр халкы һәм кунаклары 4 нче һәм 5 нче декабрьдә Россия комедияләрен карый алачак

Фото: Марат Мөгыйнов

(Казан шәһәре KZN.RU, 28 нче ноябрь). Казанда Инвалидлар декадасы кысаларында кино күрсәтүләр узачак. Комедияләрне бушлай Ленин исемендәге мәдәни-ял комплексында карарга мөмкин булачак.

4 нче декабрьдә 10:00 сәгатьтә кинотеатр кунакларына режиссерлар Илсөяр Дамаскина һәм Рөстәм Рәшитовның «Кире» фильмын күрсәтәчәкләр. Картинаның сюжеты буенча Мәскәүдән татар кешесе Казанга метрополитен станциясен төзү өчен төп геройның йортын сатып алу өчен килә. Ләкин барысы да алай гына җиңел килеп чыкмый, чөнки ир-атлар туры һәм кыек мәгънәдә төрле телләрдә аралашалар.

Икенче көнне 9:30 да казанлылар режиссер Айнур Әскәровның «Ел гаиләсе» кинотасмасын карый алачак. Фильм бурычларны каплау өчен иске микроавтобуста конкурста катнашырга баручы күп балалы Рәхмәтуллиннар гаиләсе турында. Алар ярышларның төп бүләге – гаиләне җимерелүдән коткаруның соңгы мөмкинлеге, дип ышана.

Фильмнар «Алтын тәлинкә» төбәкара кинопремиясе каталогында тәкъдим ителгән, ул Президент мәдәни инициативалар фонды ярдәме белән гамәлгә ашырыла, дип хәбәр итә Казан Башкарма комитетының Мәдәният идарәсе.

Исегезгә төшерәбез, ТР башкаласында Инвалидлар декадасында 100 дән артык чара оештырыла, алар 6,5 меңнән артык кешене колачлый. Программада вакансияләр ярминкәләре, концертлар, күргәзмәләр һәм башка вакыйгалар бар. Тулырак сылтама буенча белергә мөмкин.

Шулай ук укыгыз

Барлык яңалыклар