2022 елда Казанның Совет районында 730 балага исәпләнгән өч яңа балалар бакчасы ачылды

Тагын дүрт мәктәпкәчә учреждениедә капиталь ремонтны ел ахырына кадәр төгәлләү планлаштырыла.

Фото: Денис Гордийко

(Казан шәһәре KZN.RU, 13 нче февраль, Татьяна Марюхова). 2022 елда Казанның Совет районында 730 балага исәпләнгән өч яңа балалар бакчасы ачылды. Мәктәпкәчә учреждениеләр «Лето», «Новые Горки», Green торак комплексларында урнашкан. Ел ахырына кадәр тагын 4 балалар бакчасында капиталь ремонтны тәмамлау планлаштырыла. Быел барлыгы 400 дән артык яшь казанлы районның яңартылган мәктәпкәчә учреждениеләренә йөри алачак. Бу хакта Казан Мэры Илсур Метшинга эшлекле дүшәмбедә Совет районы администрациясе башлыгы Роман Фәтхетдинов хәбәр итте.

Хәзер капиталь ремонт 155 нче, 171 нче (2 бина), 377 нче номерлы балалар бакчаларында алып барыла. Мәктәпкәчә учреждениеләрнең берсендә эшләр төгәлләнгән инде – Совет урамындагы 171 нче бакча балалар өчен ишекләрен ачты. Быел капиталь ремонт Красная Позиция урамындагы 93 нче номерлы гимназиягә дә кагылачак.

Шул ук вакытта 8 мәктәп һәм 12 балалар бакчасы төзелешенә ихтыяҗ саклана, дип билгеләп үтте Р.Фәтхетдинов. Совет районы территориясендә 1575 күпфатирлы йортта 340 меңнән артык кеше яши, 40 мәктәп һәм 85 мәктәпкәчә учреждение эшли. Район башлыгы Рөстәм Миңнеханов карары буенча «Светлая долина» торак комплексында 1501 укучы өчен мәктәп төзү планлаштырылуын искәртте.

«Ремонт эшләре мәктәпләрдәге ашханәләргә дә кагыла. Узган ел җиде мәктәп рестораны ремонтланган иде, хәзер биш меңгә якын укучы рәхәтләнеп төшке аш һәм иртәнге аш ашый. Агымдагы елда тагын ике мәктәптә һәм өч гимназиядә ашханәләргә ремонт ясалачак», - дип хәбәр итте Р.Фәтхетдинов.

Узган ел районның 6 мәктәбендә контроль-үткәрү пунктлары төзекләндерелде, ә 62 мәктәп һәм балалар бакчасында коймаларны тулысынча алыштырдылар һәм куркынычсызлык системасын яхшырттылар.

Моннан тыш, 2022 елда Россия дәүләт гадел хөкем университетының тулай торак һәм яңа уку корпусы ачылды. Быел Попов урамында урнашкан Казан политехник көллиятенең барлык уку сыйныфларына капиталь ремонт ясау планлаштырыла, дип хәбәр итте Р.Фәтхетдинов.