2021 елда Казанда 8 балалар бакчасы һәм 2 мәктәп төзү планлаштырыла

2006 елдан шәһәрдә 125 заманча мәктәпкәчә учреждение барлыкка килгән.

Фото: Марат Мугинов

(Казан шәһәре KZN.RU, 24-нче февраль, Алена Мирошниченко). 2020 елда Казанда 10 балалар бакчасы һәм 3 мәктәп файдалануга тапшырылган. Ә 2006 елдан Казанда 125 заманча һәм уңайлы мәктәпкәчә учреждение төзелгән. Казан, Мәскәүдән кала, төзелгән балалар бакчалары саны буенча субъектлар башкалалары арасында беренче урында тора. Бу хакта бүген дүртенче чакырылыш Казан шәһәре Думасының V хисап сессиясендә, шәһәр Ратушасында Татарстан башкаласы Мэры Илсур Метшин хәбәр итте.

2021 елда Казанда 8 балалар бакчасы, «Демография» һәм «Стимул» федераль программалары буенча 2 мәктәп төзү планлаштырыла. Шәһәр башлыгы билгеләп үткәнчә, республика Президенты Рөстәм Миңнеханов һәм аның тарафыннан инициацияләнгән «Бәләкәч» программасы ярдәмендә Казан, Мәскәүдән кала, төзелгән балалар бакчалары саны буенча субъектлар башкалалары арасында беренче урында тора.

«Әмма, шундый зур күләмгә карамастан, 2009 елда башланган туучылар санының көчле артуы сәбәпле, урыннар саны барыбер җитми, бигрәк тә яңа, халык күп яши торган микрорайоннарда», – дип билгеләде И.Метшин.

Моннан тыш, республика җитәкчелеге инициативасы һәм ярдәме белән, соңгы 10 елда гомуми суммасы 6,15 млрд. сумлык 66 балаларлар бакчасы һәм 143 мәктәп бинасы ремонтланган. Шулай ук 60-70 елларда төзелгән тагын 200 балалар бакчасы һәм 27 мәктәп үз чиратын көтә.

Былтыр балалар лагерьларын һәм яшүсмерләр клубларын ремонтлау дәвам иткән. Спорт объектлары саны 105 берәмлеккә арткан. Мәктәпләрдә 10 универсаль мәйданчык, физкультура-сәламәтләндерү комплексы һәм 2 футбол манежы – «Искәндәр» һәм «Максат» төзелгән.