Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР идарәсе Корбан бәйрәме буенча тәкъдимнәрен җиткерде

Корбанлык итен алган вакытта да дистанцияне сакларга, антисептиклар, битлекләр һәм перчаткалар кулланырга кирәк.

(Казан шәһәре KZN.RU, 22-нче июль, Алена Мирошниченко). Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР идарәсе, мөмкин булганча, Корбан бәйрәмен кыскартылган форматта үткәрергә киңәш итә. Бу хакта бүген «Татар-информ» мәгълүмат агентлыгындагы матбугат конференциясендә ведомство җитәкчесе урынбасары Любовь Авдонина хәбәр итте.

«Без чараларны, мөмкин булганча, кыскартылган форматта үткәрергә киңәш итәбез. Гыйбадәтне урамда дистанцияне 1,5 м ераклыкта саклап башкарырга кирәк, ә корбан чалу вакытында коронавирустан гына түгел, ә себер язвасыннан да профилактиканың барлык чараларын үтәргә кирәк. Гыйбадәттә катнашучылар аннан прививка ясарга тиеш икәнен онытырга ярамый», - дип ассызыклады Л.Авдонина.

Корбанлык итен алган вакытта да, Кулланучылар хокукларын яклау һәм кеше иминлеге өлкәсендә күзәтчелек федераль хезмәте киңәшләре буенча, дистанцияне сакларга, антисептиклар, битлекләр һәм перчаткалар кулланырга кирәк. «Без 65 яшьтән өлкәнрәк кешеләргә өйдә калырга, чараларда катнашмаска кушабыз. Ифтра вакытындагы кебек, корбанлык итен аларга волонтерлар алып килә ала», - диде спикер.

«Халык аңлы рәвештә якын килер, элемтәләрне минимальләштерер һәм профилактика чараларын кулланыр дип өметләнәбез», - дип йомгаклады Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР идарәсе җитәкчесе урынбасары.

Исегезгә төшерәбез, быел төп мөселман бәйрәмнәренең берсе 31-нче июльгә туры килә. Татарстанда гает намазы вакыты һәм корбан чалу өчен нисаб расланды. Татарстан мәчетләрендә бәйрәм вагазьләре 3.45 сәгатьтә башлана. Гает намазы вакыты 4.15 сәгатькә билгеләнгән. 4.30 сәгатьтән мөселманнар корбан чалуга керешә алачак.

31-нче июль Татарстанда эшләми торган көн булып тора. 30-нчы июльдә эш көне озынлыгы бер сәгатькә кыскара.

Шулай ук укыгыз

Барлык яңалыклар