Яңалыклар
13.03.2020, 10:57
Казан уикенды: конкур, «Кремль урамында яз» һәм Халыклар дуслыгы йортында кино күрсәтү
Бушлай чараларның тулы исемлеге белән KZN.RU порталының традицион афишасында танышырга мөмкин.
(Казан шәһәре KZN.RU, 13-нче март). Дүрт көнлек эш атнасы ахырына якынлаша. Димәк, ял көннәрен планлаштырырга вакыт җитте. Бу ялларда казанлыларны һәм шәһәр кунакларын «Казан» ат спорты комплексы манежында узачак бөтенроссия ярышларында, «Штаб»та үткәреләчәк төбәк стрит-арт турында лекцияләрдә һәм «Әрмәнстан. Грузия. Россия. Мәдәниятләр диалогы» форумы кысаларында Татарстан Халыклары дуслыгы йортында узачак фильмнар куелышында көтеп калалар. Бушлай чараларның тулы исемлеге белән KZN.RU порталының традицион афишасында танышырга мөмкин.
Горький исемендәге паркта 5 чакрымга йөгерү (12+)
14-нче март, 9.00 сәгатьтә
Parkrun Казан - йөгерергә яратучылар өчен һәр атна саен Горький исемендәге паркта уза торган спорт чарасы. 5 чакрымга йөгерештә, яшенә яки спорт әзерлеге дәрәҗәсенә карамастан, теләгән һәркем катнаша ала. Катнашучылар исемлегенә эләгү өчен parkrunда бер тапкыр теркәлү узу һәм махсус штрих-код алу да җитә.
Конкуру буенча бөтенроссия ярышлары (6+)
14-нче март, 10.00 сәгатьтә
«Казан» ат спорты комплексында ТАССР төзелүнең 100 еллыгына багышланган Татарстан Республикасы Президенты Кубогына бәйге буенча бөтенроссия ярышлары дәвам итә. Ярышларда Киров, Самара һәм Саратов өлкәләреннән, Марий Эл һәм Татарстан республикаларыннан 120-ләп спортчы катнашачак.
Җиңү өчен спортчылар төрле яшь категорияләрендә көрәшәчәк: 11-14 яшьлек балалар, 14-18 яшьлек егетләр һәм 18 яшьтән өлкәнрәкләр. Җайдакларга 80-150 сантиметр биеклектәге киртәләр булган дистанцияләрне узарга кирәк булачак. Ярышлар кысаларында Мәскәү ат спорты федерациясе ярдәме белән «Федерацияләр Кубогы» конкур ярышының төбәк этабы узачак. Тамашачылар өчен керү ирекле.
Төбәк стрит-арт турында лекция (12+)
14-нче март, 17.00 сәгатьтә
«Штаб» креатив индустрияләр резиденциясендә төбәк стрит-арты турында түләүсез лекция узачак. Стрит-арт рәссам һәм иллюстратор Катя Раек Самараның стрит-арт сәхнәсе, рәссамнарның иске һәм яңа буыны турында сөйләячәк. Лекциядә катнашучылар белән ул шәһәрләрнең, рәссамнарның урам сәнгате охшашлыклары һәм аермалары турында фикер алышачак.
Икенчел чимал һәм эшкәртү өчен кием җыю (0+)
15-нче март, 10:00 сәгатьтән
Казанда яшәүчеләр кирәкмәгән әйберләрне, макулатура һәм пластикны икенчел чималны кабул итүнең мобиль пунктына тапшыра алачак. Экологик акция шәһәрнең сәүдә үзәкләренең берсендә узачак.
Акциягә кушылырга теләүчеләрне икенчел чималны әзерләү буенча актуаль белешмә белән танышырга, шулай ук эшкәртүгә нәрсә тапшырырга мөмкин булуын, ә нәрсә ярамый икәнен карарга чакыралар. Өстәмә рәвештә экоактивистлар балалар өчен уенчыклар һәм китаплар алмашу буенча акция үткәрәчәк. Кирәкмәгән пластик, агач, бәйләнгән әйберләр, музыкаль уенчыклар, балалар китаплары, курчаклар, фетрдан ясалган уенчыклар алып килергә мөмкин булачак. Алар барысы да яхшы хәлдә булырга тиеш. Ертылган китаплар, ватык уенчыклар, коену өчен резин уенчыклар, йомшак һәм силикон уенчыклар кабул ителмәячәк. Акция 10.00 сәгатьтән 11.00 сәгатькә кадәр түбәндәге адрес буенча узачак: Фатыйх Әмирхан проспекты, 3.
«Кремль урамында яз» социаль акциясе (12+)
15-нче март, 11.00 сәгатьтә
Татарстан Милли музеенда «Кремль урамында яз» дигән социаль акция узачак, ул хуҗасыз мәчеләрне гаиләләргә урнаштыруны күздә тота. Акциягә килүчеләр үзләренә йорт хайванын табып кына калмаячак, ә хәйрия ярминкәсендә катнашып, сукбай хайваннар приютына да ярдәм итә алачаклар.
Күргәзмәдә казанлыларны шәһәр урамнарында коткарылган 40 песине күрә алачак. Алар барысы да ветеринария процедураларын узган, бернинди чир белән дә авырмыйлар. Моннан тыш, барлык хайваннар да кулга ияләшкән һәм башка хайваннар белән яши алалар. Акциядә хайваннарның кураторлары һәм ветеринария табиблары катнашачак, алар, килүчеләргә консультация биреп, мәчеләрне тоту һәм карау кагыйдәләренә өйрәтәчәкләр.
Шулай ук приютта песиләрне тотуга, приют карамагындагылар өчен азык һәм уенчыклар җыюга юнәлдереләчәк хәйрия ярминкәсе дә үткәрү планлаштырылган. Моннан тыш, барлык теләүчеләр өчен фотозона, букинистик бүлек, хна белән язу һәм аквагрим төшерү өчен мәйданчыклар оештырылачак.
Күргәзмә 11.00-дән 16.00-гә кадәр түбәндәге адрес буенча узачак: Кремль ур., 2. Тулырак мәгълүматны социаль челтәрләрдән белергә мөмкин.
«Әрмәнстан. Грузия. Россия. Мәдәниятләр диалогы» кино куелышы (6+)
15-нче март, 17.00 сәгатьтә
Татарстан Республикасы Халыклары дуслыгы йортында «Әрмәнстан. Грузия. Россия. Мәдәниятләр диалогы» документаль фильмы куелышы булачак. Картина Россия, Әрмәнстан һәм Грузия тугандаш халыкларының дуслыгы турында сөйли. Сеанстан соң иҗат коллективлары катнашында концерт булачак.
Шулай ук укыгыз
-
30.04.2025, 15:45 -
30.04.2025, 14:03 -
30.04.2025, 09:14 -
29.04.2025, 17:56
