«Чиста уеннар» форматындагы өмәдә катнашучылар Мирныйдагы каенлык территориясен җыештырачак

Өмә уза торган урыннарга кадәр һәм кире юнәлештә махсус автобуслар йөриячәк.

Фото: Денис Гордийко

(Казан шәһәре KZN.RU, 19 нчы апрель). Быел «Чиста уеннар» Казанда гомумшәһәр өмәсен үткәрүнең бер форматы булып торачак. 22 нче апрельдә барлык теләүчеләр команда җыя һәм Мирныйдагы каенлык территориясен җыештыра алачак. Чара программасында кыр кухнясы, концерт һәм DJ-сетлар, экофутбол, пластикны эшкәртү буенча остаханә бар.

Ярышлар өмәсендә катнашу өчен бердән дүрт кешегә кадәр команда җыярга һәм аны сылтама буенча теркәргә кирәк. Шулай ук «Чиста уеннар» кушымтасын урнаштыру таләп ителә, ул Google Play яки App Store'да бар. Җиңүче командаларны сайлаганда жюри җыелган чүп-чарның күләмен, аның сортларга бүленүен, шулай ук эковикториналарда катнашуын бәяләячәк. Иң яхшы командалар кыйммәтле бүләкләр алачак.

8:30 дан 9:30 га кадәр мәйданчыкта теркәлү, инвентарь бирү һәм мастер-класслар узачак. 9:00 сәгатьтән 10:00 сәгатькә кадәр концерт, инструктаж, зарядка, шулай ук иҗади дәресләр үткәрелә. Уен үзе 10:00 сәгатьтән 11:00 сәгатькә кадәр дәвам итәчәк, шуннан соң катнашучыларны концерт, кыр кухнясы һәм бүләкләү көтәчәк. «Чиста уеннар» 12:00 сәгатьтә тәмамланачак.

Өмә Фермер шоссесы янындагы каенлыкта узачак. Майданчыкка электричка («Березовая роща» станциясе), 23 нче һәм 56 нчы номерлы рейс автобуслары белән барып җитәргә мөмкин. Шулай ук Казан циркыннан һәм кире юнәлештә махсус автобуслар йөриячәк. Автобуслар 8:00, 8:10, 8:20 һәм 8:30 сәгатьләрдә кузгалыр дип көтелә. Автобуслар 12:00 һәм 12:30 сәгатьтә кайтачак.

Гомумшәһәр өмәсе Казан Мэриясе тарафыннан «Сибур» ААҖ белән берлектә оештырыла.

Исегезгә төшерәбез, «Чиста уеннар» – табигый территорияләрне чүп-чардан чистарту һәм калдыкларны аеру буенча команда ярышлары. Уен барышында катнашучылар артефактлар эзлиләр, экологик табышмакларны чишәләр, чүп-чарны җыялар һәм аерым төрләргә бүләләр һәм моның өчен баллар алалар. Уеннар статистикасы сайтта һәм мобиль кушымтада алып барыла. Бер уен кысаларында катнашучылар 2-5 тонна чүп җыячак.

Шулай ук укыгыз

Барлык яңалыклар