Яңалыклар
23.03.2023, 17:33
Россия халык хуҗалыгы һәм дәүләт хезмәте академиясе программасында катнашучылар Danaflex компаниясендә һәм «Химград» технополисында булдылар
Программа тыңлаучылары инновацион җитештерү мәйданчыклары белән таныштылар.
Фото: Денис Гордийко
Danaflex компаниясе тарихы белән кунакларны персонал буенча директор Елена Бочарова таныштырды. Ул компаниянең профессиональ үсеше, нинди юл үтүе, соңгы җиңүләре турында сөйләде һәм уникаль кадрлар практикасы белән таныштырды. Danaflexның соңгы чорындагы барлык үзгәрешләр турыдан-туры эшчеләр өчен уңайлы шартлар тудыру һәм экологиягә игътибар белән бәйле.
Компания җитәкчелеге сакчыл җитештерү технологияләрен актив кертә, кунаклар моны цех буйлап экскурсия вакытында ачык күрә алдылар. Компаниянең продукциясе таныла – анда соуслар, макароннар, балалар йогуртлары, кофе, шәхси гигиена чаралары һәм кибет киштәләрендә очрый торган башка товарлар тутырылган.
Программа тыңлаучыларының бер өлеше «Химград» технополисында булды. Индустриаль парк буенча экскурсияне генераль директор Айрат Гыйззәтуллин үткәрде. Кунаклар технополис тарихы һәм төп икътисади күрсәткечләр белән таныштылар. Бүген «Химград» территориясендә 360 тан артык компания эшли, алар төрле тармакларны тәкъдим итә – бу полимер эшкәртү, приборлар төзү, металл эшкәртү, роботлар җитештерү һәм башка күп нәрсәләр.
«2022 елда резидентларыбызның кереме 68 млрд сумнан артып китте. Узган елга үсеш темпы 18% тәшкил итә. Хәзер территориядә 10 меңнән артык кеше эшли. Индустриаль паркны тутыру проценты 90 тирәсе тәшкил итә, тагын берничә җир кишәрлеге бар, аларда без проектлау алып барабыз һәм якын арада объектлар төзүгә керешәчәкбез», – дип сөйләде Айрат Гыйззәтуллин.
Тыңлаучылар шулай ук технополис резидентлары белән шәхсән таныша алдылар, алар берничә цехта булды.
Моңа кадәр программада катнашучылар шәһәрнең Совет районындагы 11 нче «Унбер» лицеенда һәм «Игелекле Казан» коворкинг автоном оешмасында булдылар, хакимият башлыгы Роман Фәтхетдинов һәм Башкарма комитет Аппараты җитәкчесе Булат Алиев белән очраштылар. Программада шәһәр Мэры Илсур Метшин белән очрашу да булды.
«Шәһәрнең үсеш тарихын башкала җитәкчесе авызыннан белү кызык иде. Без, башка төбәкләр вәкилләре буларак, үзебез өчен күп нәрсәне ассызыклый алдык», – дип тәэсирләре белән уртаклашты Томск политехник техникумы директоры Иван Криволапов. Ул билгеләп үткәнчә, Казанда кулланыла торган алымнар Россиянең башка төбәкләрендә һәм шәһәрләрендә кулланыла торган алымнардан аерылып тора.
«Мин Казанда күп тапкырлар булдым һәм ни өчен ул шулай гөрләп чәчәк ата һәм барлык рейтингларда да диярлек беренче урында тора икәнен аңлыйм. Болар барысы да республика Рәисе һәм шәһәр Мэры ярдәмендә, – дип саный Самара губерна Думасы депутаты Роман Балтер. – Без Совет районы администрациясендә булдык. Хезмәткәрләр өчен дә, халык өчен дә бик матур һәм уңайлы эшләнгән! Бу бик зур хөрмәткә лаек».
Мәскәүдән «Дассо Систем» җаваплылыгы чикләнгән җәмгыятенең сату буенча директоры Константин Галкин ТР башкаласына икенче тапкыр килгән. Ул беренче тапкыр шәһәрдә берничә ел элек гаиләсе белән булган. «Хәзерге вакытта мин укыту модулен узганда, хатыным һәм балам янә минем белән килделәр, монда тагын бер тапкыр йөрергә, Кремль, матур мәчетләр, гыйбадәтханәләр һәм башка истәлекле урыннарны карарга уйлыйбыз», – дип сөйләде Константин Галкин.
Программада катнашучылар шулай ук 7 нче шәһәр клиник хастаханәсендә, Азык-төлек һәм социаль туклану департаментында һәм Шәһәрне үстерү институтында булдылар, анда Казанның баш архитекторы Илсөяр Төхвәтуллина белән очраштылар.
Исегезгә төшерәбез, мәгариф программасы кысаларында берничә көн дәвамында Россиянең төрле төбәкләреннән 70 тән артык кеше Казанның шәһәр хуҗалыгының төрле өлкәләрендәге тәҗрибәсе белән таныша. Ул илнең 38 шәһәреннән – Калининград, Екатеринбург, Краснодар, Красноярск, Түбән Новгород, Томск, Тольятти, Чита, Чиләбе һәм башкалардан дәүләт һәм муниципаль хезмәткәрләрне, компанияләрнең хуҗаларын һәм җитәкчеләрен, социаль өлкә вәкилләрен һәм иҗтимагый хәрәкәтләр җитәкчеләрен берләштерә.
Фото: Денис Гордийко, «Химград» технополисы
Шулай ук укыгыз
-
29.04.2025, 17:56 -
29.04.2025, 17:11 -
29.04.2025, 16:43 -
29.04.2025, 16:02
