Бокс һәм өстәл теннисы үзәген БРИКС уеннарына ремонтлаячаклар

Бинада 1,7 мең урынга исәпләнгән трибуналар белән универсаль зал җиһазландырылачак

Фото: Денис Гордийко

Казанның Совет районындагы Бокс һәм өстәл теннисы үзәген БРИКС уеннарына капиталь ремонтлаячаклар. Эшләр тәмамланганнан соң, комплекска биш яшьтән алып һәм өлкәнрәк 2 меңгә кадәр бала һәм яшүсмер йөри алачак.

Тема буенча материаллар:

Илсур Метшин: «Киләсе 10 елга Үзәк стадионда ярышлар уздыру өчен халыкара стандарт тәэмин ителәчәк»

Җ.Фәйзи урамы, 2а адресы буенча урнашкан бинаның мәйданы 17 мең кв. метрдан артып китә. Биредә 1782 урынга исәпләнгән трибуналар белән универсаль зал, тренажерлар залы, дзюдо һәм тхэквондо белән шөгыльләнү өчен күнекмәләр залы, ике хореография залы, спортчылар һәм тренерлар өчен ял бүлмәләре җиһазландырылачак.

Теннис залында 29 махсус өстәл куелачак, ә бокс өчен тренировка залында алты ринг пәйда булачак.

Хәзер объектта төзелеш-монтаж эшләре алып барыла. Бригадалар җиһазлар урнаштыра. Тиздән янәшәдәге территорияне төзекләндерү планлаштырыла.

Капиталь ремонт «БРИКС уеннары. Спорт объектлары» программасы буенча гамәлгә ашырыла, дип хәбәр иттеләр Совет районы администрациясендә.

БРИКС уеннары Татарстан башкаласында 10-26 нчы июньдә шәһәрнең 17 спорт объектында узачак. 4,7 мең спортчы һәм делегация әгъзалары килер дип көтелә. Ярышлар 29 спорт төрен (шуларның 20 се – Олимпия төрләре) үз эченә алачак.

Шулай ук укыгыз

Барлык яңалыклар