Быел Казанның Юныс мәйданындагы өч сквер төзекләндереләчәк

Белгечләр, агачларны мөмкин кадәр саклап, әзерлек эшләре үткәргән

Фото: Денис Гордийко

(Казан шәһәре KZN.RU, 22 нче июнь). Быел Казанның Вахитов районындагы Юныс мәйданында өч сквер төзекләндереләчәк. Җәмәгать киңлекләре территориясендә куаклар һәм чәчәкләр утыртылачак, автосугару белән газон җәеләчәк, видеокамералар, утыргычлар, урналар һәм агач юллар урнаштырылачак. Һәр сквер өчен, татар мәдәниятенә басым ясап, вакыйгалар программасының үз сценариен эшләячәкләр.

Шәһәр Башкарма комитетының Тышкы төзекләндерү комитетында хәбәр итүләренчә, Юныс мәйданында әзерлек эшләре башкарылган инде. Белгечләр, мәйданчыкларны төзекләндергәндә зыян күрмәсен өчен, булган агачларны саклап калган һәм аларны каплаган.

Беркутов йорты янындагы скверда (Тукай урамы, 59/11) инде брусчатка җәяләр һәм яктырту челтәрләрен җиһазландыралар.

Беркутов йортыннан юл аша мәйданда борт ташын урнаштыралар һәм электр челтәрләре белән эшләргә әзерләнәләр.

Фатыйх Кәрим урамындагы скверда ремонт әле башланмаган. Җир асты газүткәргечендә эшләр башкарылырга тиеш, ә аннан соң гына – төзекләндерү.

Элегрәк KZN.RU порталы Юнысов мәйданында беренче скверны реконструкцияләгәннән соң Сагыш бакчасы ачылуы турында хәбәр иткән иде. Территориядә юл япмасы, автомат су сибү белән газон җәелгән, коймалар урнаштырылган. Шулай ук сквер видеокүзәтү һәм тышкы яктырту системалары белән җиһазландырылган.

Шулай ук укыгыз

Барлык яңалыклар