Татарстанлылар электрон рәвештә 110,2 млн дәүләт һәм муниципаль хезмәте алган

Электрон көндәлек һәм табибка язылу татарстанлыларның иң популяр сервислары булып тора икән.

(Казан шәһәре KZN.RU, 14-нче май). Агымдагы елның дүрт аенда татарстанлыларга 110,2 млн хезмәт күрсәтелгән. Гомумән алганда, республика халкы 94,8 млн электрон сорау җибәргән һәм 6,4 млн тапкыр электрон чиратка язылу функциясеннән файдаланган.

Моннан тыш, ТР Дәүләт хезмәтләре порталы аша гражданнар хезмәт алу өчен 4,1 млн электрон гариза биргән, 9,6 млрд сумга 4,8 млн нан артык түләү башкарган.

Электрон көндәлек (көненә якынча 418 мең куллану) һәм табибка язылу (аена 1,5 млн. язма) татарстанлыларның иң популяр сервислары булып тора. Хәер, медицина учреждениеләренә кабул итүгә язмалар саны республикада кертелгән үзизоляция режимына бәйле рәвештә апрельдә кискен кимегән.

ТР Министрлар Кабинеты билгеләгәнчә, узган елның шул ук чоры белән чагыштырганда, ТР дәүләт хезмәтләре порталы эшчәнлегенең төп күрсәткечләре 8%-ка арткан.

Бүген порталда 296 электрон сервис тәкъдим ителгән. Бу хезмәтләрне тулысынча дистанцион форматта алырга мөмкин.

Исегезгә төшерәбез, дәүләт хезмәтләре порталы аша Казанның 46 муниципаль хезмәтен дә электрон форматта алырга мөмкин. Алар халыкның һәм эшкуарларның Башкарма комитетка мөрәҗәгатьләренең 78%-ын тәшкил итә. Бу хезмәтләрне алу өчен бернинди учреждениеләргә дә барырга кирәкми.

Шулай ук укыгыз

Барлык яңалыклар