Татарстанлылар Росреестрга республика дәүләт хезмәтләре порталы ярдәмендә языла ала

Казанда халыкны атнага ике тапкыр 8:00 сәгатьтән 12:00 сәгатькә кадәр кабул итәләр.

Фото: Денис Гордийко

(Казан шәһәре KZN.RU, 30 нчы гыйнвар). Татарстан халкы дәүләт хезмәтләре порталында Росреестр белгечләренә консультацияләргә алдан языла ала.

Электрон язылу өчен авторизация узарга, «Гражданнар өчен хезмәтләр» бүлегендә Росреестр хезмәтләрен сайларга, шуннан соң «Консультатив кабул итүгә язылу» төймәсенә басарга кирәк. Халыкның бүлекне, урнашу урынын, тематикасын һәм консультация вакытын сайлау мөмкинлеге бар.

Казанда халыкны сишәмбе һәм пәнҗешәмбе көннәрендә 8:00 сәгатьтән 12:00 сәгатькә кадәр кабул итәләр. Тулырак мәгълүматны сылтама буенча белергә мөмкин.

Шулай ук гражданнар өчен кире элемтә платформасы эшли, аның ярдәмендә Росреестр сайтларында РФ Дәүләт хезмәтләре порталы һәм виджетлар аша мөрәҗәгатьне юлларга һәм тиз арада җавап алырга мөмкин. Моның өчен «Дәүләт хезмәтләре. Бергәләп хәл итәбез» баннерына басарга, мөрәҗәгатьне тасвирларга һәм тематиканы сайларга, порталда авторизация узарга һәм мөрәҗәгатьне юлларга кирәк, дип хәбәр итә ТР Росреестрының матбугат хезмәте.

«Әлеге сервислар дәүләт хезмәтләрен алу мөмкинлеген арттырачак. Язылуның яңа ысулы гражданнарга алдан ук кабул итүне планлаштырырга мөмкинлек бирәчәк, ә кире элемтә системасы ТР Росреестрына гражданнар мөрәҗәгатьләре буенча оператив җаваплар бирәчәк», – дип билгеләп үтте Татарстан Росреестры җитәкчесе урынбасары Лилия Борһанова.

Исегезгә төшерәбез, Росреестрның тәүлек буе эшли торган колл-үзәге дә бар. Шалтыратуларны +7(800)100-34-34 телефоны буенча кабул итәләр.

Шулай ук укыгыз

Барлык яңалыклар