«Tartaria: милли код»: Казанда татар халкының милли үзенчәлеген чагылдыра торган лекцияләр циклы тәкъдим ителә

Чарада катнашу өчен теркәлү мөһим

Киләсе атнада, 23 сентябрь көнне Татарстан башкаласында «Tartaria: милли код» лекцияләр циклы башланып китә. Беренче очрашу «Татарлар кемнәр алар: бу хакта нәрсә белергә һәм ни өчен?» темасын яктырта торган чара булачак.

Лекцияләр циклы татар халкының тарихы һәм мәдәнияте турында заманча карашлар структурасын һәм системасын аңларга ярдәм итәчәк. Чара кунаклары уйдырмалар хакында сөйләшеп, фикерләү системасын үзгәртү принциплары мәсьәләсендә фәннең ни дәрәҗәдә әһәмиятле булуын беләчәкләр.

Беренче очрашуда кунакларны мәдәни үзенчәлекләр белән тарих фәннәре докторы Радик Салихов таныштырачак. Чарада катнашу өчен сылтама аша теркәлергә кирәк.

«Иске шәһәр» префектурасында хәбәр итүләренчә, белем бирү-агарту чарасы сәгать 18:30 да башлана. Теркәлгән барлык катнашучыларны Габдулла Тукай урамы, 97 йорт адресы буенча урнашкан «Кызыл Шәрык» заводы янында көтәләр.

Проект «Тарихи мохит» муниципаль бюджет учреждениесе тарафыннан тарихчы Энҗе Дусаева һәм Ш.Мәрҗани исемендәге Тарих институты белән берлектә «Иске шәһәр» префектурасы ярдәмендә оештырыла.

Исегезгә төшерәбез, 20 сентябрьдә «Смена» заманча мәдәният үзәгендә «Өйрән һәм буя!» күргәзмәсе ачыла. Экспозициягә килүчеләр тамашачы булу белән бергә, рәссам да булачак.

Шулай ук укыгыз

Барлык яңалыклар