«Яктылык иле»: Qazan.exe комьюнити – заманча сәнгать конкурсы финалында

Казанның медиа рәссамнары бәйгегә «Әкият» аудиовизуаль композициясен тәкъдим иткән

Денис Гордийко фотосы

Qazan.exe берләшмәсеннән Казан медиа рәссамнары Бөтенроссия «Яктылык иле» заманча сәнгать бәйгесенең финалына үтте. Алар бәйгегә «Әкият» аудиовизуаль композициясен тәкъдим иткән.

Казан рәссамнарының эше бәйгегә тапшырылган 170 проект арасында иң яхшыларыннан 11-е арасына кергән. Бу елны алар «Кече Ватан әкиятләре, риваятьләре, мифлары» темасын берләштерә.

«Әкият» аудиовизуаль композициясендә татар әкиятләре һәм риваятьләре геройлары: аҗдаһа Зилант, сулыкларны яклаучы Су анасы һәм урман сакчысы Шүрәле катнаша. Тамаша татар халкының бөек шагыйре Габдулла Тукай шигырьләреннән өзекләр һәм заманча музыканың этник мотивлар кушылмасы белән үрелеп бара.

«Татар рәссамнары үз эшләрендә формалар, генератив алгоритмнар, аудиовизуаль мохит белән тәҗрибәләр үткәрә һәм заманча технологияләрнең сәнгатьне тулыландыруы белән бергә, аны тамашачы тарафыннан кабул итү принципларын да үзгәртүен тикшерә», - дип билгеләп үттеләр конкурсны оештыручылар.

Конкурсның финалы 6 һәм 7 декабрьдә Санкт-Петербургның Сарай мәйданында узачак, анда Гвардия корпусы штабы фасадында мэппинг-спектакльләр күрсәтеләчәк. Чара ВКонтакте челтәрендә бәйгенең рәсми бергәлегендә онлайн-трансляцияләнәчәк.

Конкурсның абсолют җиңүчеләрен эксперт жюри сайлаячак, ә тамашачылар симпатиясе призы проектның рәсми сайтында ачык тавыш бирү юлы белән билгеләнәчәк.

Шулай ук укыгыз

Барлык яңалыклар