«Тоталь диктант» акциясендә катнашуга теркәлү башланды

Рус телен белүне 5 апрельдә тикшерергә мөмкин булачак

5 апрельгә планлаштырылган «Тоталь диктант» халыкара агарту акциясендә катнашуга теркәлү башланды. Быел рус телен белүне теләгән һәркем 50 дән артык мәйданчыкта тикшерә алачак.

Текстны язучы, сценарист, Андерсенның Халыкара Мактаулы дипломы лауреаты Марина Москвина әзерләде. Катнашучылар үзләренең грамоталылыгын тикшереп кенә калмыйча, мавыктыргыч әдәби сәяхәткә дә чыгачаклар. Дикторлар сыйфатында актерлар, җырчылар, блогерлар, җәмәгать эшлеклеләре, шулай ук журналистлар һәм радио алып баручылары җәлеп ителәчәк.

А.С.Пушкин исемендәге мәдәният үзәге, ТР Милли китапханәсе һәм Филология һәм мәдәниятара багланышлар институты акцияне үткәрүнең үзәк мәйданчыклары булачак. Чит ил студентлары диктантның гадиләштерелгән вариантын яза һәм Казан дәүләт медицина университетында рус теле буенча тест уза алачак. Мәйданчыкларның тулы исемлеге сылтама буенча бастырылган.

Акциягә әзерләнергә теләүчеләр өчен бушлай курслар уза. Алар дүрт дәресне үз эченә ала. Дәресләр вакытында катнашучыларга сынау текстларын әйтеп яздырачаклар һәм аларны экспертлар белән тикшерәчәкләр. Катнашу өчен теркәлү кирәк. Шулай ук һәр чәршәмбедә акциянең рәсми төркемендә онлайн курслар уздырыла – моның нәтиҗәсендә әзерлеккә дөньяның теләсә кайсы ноктасыннан кушылырга мөмкин.

«Мәйданчыклар» бүлегендә уңайлы урын сайлап, шәхси кабинет аша мәйданчыкка килеп яза торган диктантка теркәлергә кирәк. Республикада акция Татарстан Республикасының «Мәдәниятләр һәм диалог үзәге» Татарстан яшьләр иҗтимагый оешмасы белән берлектә Татарстан Республикасының Рус милли-мәдәни берләшмәсе тарафыннан оештырылды.

Тоталь диктант – яшенә, милләтенә, белем дәрәҗәсенә һәм социаль статусына карамастан, барлык теләүчеләр өчен ел саен үткәрелә торган акция. Узган ел акциядә 7,2 меңнән артык казанлы катнашты, ә Татарстан башкаласы «Тоталь диктант»ка кушылучылар саны буенча рейтингта өченче булды.

Шулай ук укыгыз

Барлык яңалыклар