2024 елда БДИ уздыру даталары билгеле булды

Имтиханнарны тапшыруның төп чоры 23 нче майда башлана

Фото: Денис Гордийко

(Казан шәһәре KZN.RU, 10 нчы гыйнвар). Россиядә Бердәм дәүләт имтиханнарын 2024 елда үткәрү даталары расланды. БДИ тапшыруның төп чоры 23 нче майда башланачак, 1 нче июльдә тәмамланачак. Белемнәрне вакытыннан алда 22 нче марттан 22 нче апрельгә кадәр тикшерергә мөмкин булачак, өстәмә чор 4 нче сентябрьдән 23 нче сентябрьгә кадәр узачак.

БДИны беренчеләрдән булып 23 нче майда география, рус әдәбияты һәм химияне сайлаган чыгарылыш укучылары тапшырачак. Рус теле – 28 нче майга, база һәм профиль дәрәҗәдәге математика 31 нче майга билгеләнгән. Урта гомуми белем турында аттестатларны вакытында бирү мөмкинлеге булсын өчен мәҗбүри фәннәр буенча имтиханнар башкалардан иртәрәк булачак.

Җәмгыять белеме буенча БДИ – 4 нче июньдә, тарих һәм физика буенча – 10 нчы июньдә, ә биология һәм чит телләр буенча имтиханның язма өлеше буенча 13 нче июньдә узачак. Информатиканы тапшыручы чыгарылыш укучылары өчен имтихан ике көндә – 7 нче һәм 8 нче июньдә була. Традицион рәвештә чит тел буенча БДИның телдән өлеше дә бүленгән – алар 17 нче һәм 18 нче июньдә узачак.

20 нче июньнән 1 нче июльгә кадәрге чор резерв көннәр өчен билгеләнгән, дип хәбәр иттеләр Рособрандзорның матбугат хезмәтендә.

Төп дәүләт имтиханы (ОГЭ) шулай ук өч этапта үткәреләчәк: төп (21 нче майдан 2 нче июльгә кадәр), вакытыннан алда (23 нче апрельдән 18 нче майга кадәр) һәм өстәмә (3 нче сентябрьдән 24 нче сентябрьгә кадәр).

Информатика буенча төп дәүләт имтиханы (ОГЭ) һәм дәүләт чыгарылыш имтиханы (ГВЭ) имтиханнарны тапшыруның төп чорында өч көндә (27 нче майда, 11 нче һәм 14 нче июньдә) компьютер җиһазларын куллану сәбәпле үткәреләчәк.

Ведомствода 24 нче һәм 25 нче майга планлаштырылган 9 нчы сыйныф өчен имтиханнарның күчерелүе турында җиткерделәр. Шулай итеп, буш көннәрдә соңгы кыңгырауны үткәрү мөмкинлеге барлыкка киләчәк.

Шулай ук укыгыз

Барлык яңалыклар