Көненә ничә литр су эчәргә һәм аны башка сыекчалар белән алыштырып буламы – табиб киңәшләре

Су куллану нормасы кешенең авырлыгына һәм яшенә, һава шартларына һәм физик йөкләнешкә бәйле.

Фото: Денис Гордийко

(Казан шәһәре KZN.RU, 8 нче июнь). КФУның Университет клиникасының беренче терапия бүлеге мөдире Илсөяр Шәфигуллина казанлыларга су балансын саклау буенча киңәшләр бирде. Киңәшләр югары уку йорты сайтында бирелә.

Аның сүзләренә караганда, суны куллану нормасы кешенең авырлыгына һәм яшенә, һава шартларына һәм физик йөкләнешкә бәйле. Тәүлегенә уртача бер литрдан биш литрга кадәр су эчәргә кирәк. Организмнан су сулыш алу һәм тирләү нәтиҗәсендә бүленеп чыга, шуңа күрә уртача физик активлык булганда су югалту тәүлек эчендә якынча 2,5 литр тәшкил итә дип санала.

«10 һәм аннан да күбрәк процент сусызлану үлемгә китерә. Шуңа күрә кеше югалткан суны тәүлек эчендә тулыландырырга тиеш. Су куллануның индивидуаль нормасын исәпләргә кирәк», - дип сөйләде Илсөяр Шәфигуллина. Моны махсус онлайн-калькуляторлар һәм таблицалар ярдәмендә эшләргә мөмкин.

Терапевт онлайн-сервисларда су куллануның уртача нормасы килограммга 20-30 миллилитр тирәсендә күрсәтелә дип өстәде. Ягъни, конкрет кеше өчен норманы исәпләү өчен, бер цифрны (миллилитрларны) икенчесенә (авырлыгына) тапкырларга кирәк. Әгәр дә кеше артык авырлыктан интегә икән, «идеаль» авырлыкны исәпкә алырга тәкъдим ителә. Аны «буй минус 100» формуласы буенча исәпләп чыгарырга мөмкин.

Әгәр артык авырлыгы булган кеше билгеле бер су диетасын тота икән, аның су куллану нормасы килограммына 40 миллилитр тәшкил итәргә тиеш, дип төгәлләде Илсөяр Шәфигуллина. Шулай ук һава шартларын да исәпкә алырга кирәк – эсседә исәпләнгән күләмгә 20 процент өстәлә.

«Табиблар сыеклык кабул итүне чикләгән очраклар бар: нигездә, йөрәк-кан тамырлары системасы һәм бөер авырулары булганда. Киресенчә, кулланыла торган сыеклыкны арттырырга кирәк булган очраклар бар. Тән температурасы күтәрелгәндә һәм кискен йогышлы авырулар вакытында су күләме күбрәк булырга тиеш», – дип аңлатты белгеч.

Җәй көне бер яшькә кадәрге балаларга тәүлегенә 20-30 миллилитр су бирергә кирәк, өч яшьтән биш яшькә кадәрге балалар 300-400 миллилитр эчәргә тиеш. Ә өлкән яшьтәгеләр өчен норма 1,2-1,5 литр белән чикләнгән. Илсөяр Шәфигуллина шулай ук суның күп өлеше физик йөкләнешләр нәтиҗәсендә организмнан чыга дип билгеләп үтте. Бу югалтуны алдан ук тулыландырырга мөмкин. Белгеч күнегүләр башланганчы 200 миллилитрга кадәр эчәргә һәм су балансын һәр 30 минут саен сакларга киңәш итә.

«Организм өчен иң гади ориентир – сусау. Шунысын да истә тотарга кирәк, ул су югалтудан соңрак барлыкка килергә мөмкин, шуңа күрә күнегүләр вакытында әкренләп су эчәргә киңәш ителә», – дип киңәш итте терапевт.

Шуны истә тотарга кирәк: чәй, сөт продуктлары, соклар һәм башка сыеклыклар организмда су кебек кабул ителми. Илсөяр Шәфигуллина аңлатканча, югарыда санап үтелгән барлык эчемлекләрнең составында аксым, май, углевод һәм аминокислоталар бар, ягъни аларда калория бар һәм организм тарафыннан ризык буларак укыла.

Шулай ук укыгыз

Барлык яңалыклар