Мобилизацияләнгән казанлыларның гаиләләре берничә айга көнкүреш химиясе запасы алачак

Атна ахырына кадәр гуманитар ярдәмне район администрацияләренә таратачаклар, алар җыелмаларны гаиләләргә тапшырачаклар.

Фото: Марат Мөгыйнов

(Казан шәһәре KZN.RU, 20 нче декабрь). Мобилизацияләнгән казанлыларның гаиләләре «Нәфис Косметикс»тан берничә айга көнкүреш химиясе запасын алачак. Бүгенге көндә Татарстан башкаласында яшәүчеләр өчен гуманитар ярдәм складына кер юу порошоклары, сабын, чистарту һәм юу чаралары белән 14 тонна продукция җыелмасы җибәрелгән.

«Атна ахырына кадәр гуманитар ярдәмне Казан районнары администрацияләренә таратачаклар, шуннан соң хезмәткәрләр көнкүреш химиясен мобилизацияләнүчеләрнең гаиләләренә тапшырачаклар», - дип сөйләде шәһәр Башкарма комитетының Социаль сәясәт идарәсе башлыгы Ирина Смирнова.

Компания республиканың барлык шәһәр һәм районнарында яшәүче мобилизацияләнүчеләрнең гаиләләрен көнкүреш химиясе белән тәэмин итәчәк. «Нәфис Косметикс» 70 тоннадан артык көнкүреш химиясе тапшырыр дип планлаштырыла, беренче партияләр бу атнада төяп җибәрелгән. Әлеге эш РФ Дәүләт Думасы депутаты Ирек Богуславский инициативасы белән алып барыла.

«Мобилизацияләнгән кешеләргә үз гаиләләренең имин булуын, алар турында кайгыртуларын сизү бик мөһим. Хатыннар, балалар, ата-аналар белән барысы да тәртиптә икәнен, ә өйдә тыныч булуын аңлау гражданлык бурычын батырлык һәм абруй белән башкарырга көч бирә», - дип билгеләде И.Богуславский. «Мөмкин кадәр күбрәк компанияләрнең һәм битараф булмаган кешеләрнең мобилизацияләнүчеләргә һәм аларның гаиләләренә ярдәм итүе мөһим», - дип өстәде ул.

Хәрби хезмәткәрләрнең гаиләләре өчен көнкүреш химиясе җыелмалары «Нәфис Косметикс»ның беренче ярдәме генә түгел. Компания марттан бирле Донбасска, Донецк һәм Луганск халык республикаларының халыкны вакытлыча урнаштыру үзәкләренә гуманитар ярдәм күрсәтә. Предприятие төбәкләрдә яшәүчеләр һәм хәрби хезмәткәрләр өчен кер юу порошоклары, чистарту чаралары, сабын һәм башка көнкүреш химиясе белән 13 фура җибәрде. Гуманитар ярдәмнең авырлыгы 241 тонна иде.

Моннан тыш, ноябрь аенда «Нәфис Косметикс» танк полигонында урнашкан мобилизацияләнүчеләрне җыю пунктында 10 кер юу машинасы булган кер юу комплексы төзегән, анда берьюлы 100 кг кадәр кием юарга була. Компания тагын 10 кер юу машинасын «Казан Экспо» халыкара күргәзмә үзәгендә булган хәрбиләргә тапшырды. Шулай ук «Нәфис Косметикс» һәм Казан май комбинаты мобилизацияләнгән хезмәткәрләренең һәр гаиләсенә 30 мең сум акча биргән, дип хәбәр итә компаниянең матбугат хезмәте.

Шулай ук укыгыз

Барлык яңалыклар