Бүген Горки-Әмәт урманында фонтан эшли башлаячак

Быелгы җәйдә Комсомол һәм Аккош күлләре янында төзекләндерелгән яңа пляжлар ачылачак.

(Казан шәһәре KZN.RU, 18-нче май, Алена Мирошниченко). Бу җәйдә Казанда яңа ял зоналары - Комсомол һәм Аккош күлләре янында төзекләндерелгән пляжлар ачылачак. Алар җәйнең беренче көнендә су коену сезоны башлану белән бер үк вакытта үз эшләрен башлаячаклар. Ә бүген шәһәр паркларында фонтаннар эшли башлый, дип хәбәр итте коронавирус инфекциясе таралуга каршы тору буенча штаб утырышында Парклар һәм скверлар дирекциясе җитәкчесе Марат Закиров.

«Монда уңайлы ял итү өчен бөтен инфраструктура булдырылган - заманча ятаклар, душ, балалар мәйданчыклары, бәдрәфләр, су һәм туңдырма сату пунктлары, җәйге инвентарьны прокатка чыгару. Әлеге урыннарда куркынычсызлык хезмәте хезмәткәрләре, коткаручылар кизү торачак», - дип сөйләде ул.

М.Закиров искә төшергәнчә, «Казан» гаилә үзәге, Җиңү паркы, Урицкий исемендәге һәм «Черек күл» паркындагы яр буе зоналары сулыкларда коену өчен түгел, ә яр буенда уңайлы ял итү өчен билгеләнгән.

Бүген Горки-Әмәт урманында фонтанны эшләтеп җибәрәчәкләр, 19-нчы майда - «Ак чәчәкләр» бульварында һәм Лядской бакчасында. Май ахырына кадәр Кәрим Тинчурин исемендәге скверда, Горький исемендәге паркта, «Крылья Советов» паркында фонтаннар эшли башлаячак. Ә 3-нче июньдә Түбән Кабан күлендә шәһәрнең иң зур фонтанын эшләтеп җибәрәчәкләр.