Өлкәннәр өчен үзизоляция һәм QR-кодлар: 11 октябрьдән Татарстанда өстәмә чикләүләр үз көченә керә

Бу коронавирус инфекциясе таралу аркасында халыкның тормышы һәм сәламәтлегенә янаган куркынычны киметү өчен кирәк.

Фото: Денис Гордийко

(Казан шәһәре KZN.RU, 8-нче октябрь). 11-нче октябрьдән Татарстанда өстәмә ковидка каршы чаралар кертелә. Тиешле карар ТР Министрлар Кабинетында имзаланды.

11-нче октябрьдән театрлар, кинотеатрлар, цирклар, концерт залларының тамаша заллары 50%-тан да артык тулмаган, әмма кеше саны 500-дән дә артмаган очракта эшли алачак. Әгәр барлык хезмәткәрләр, шулай ук чараны оештыруда һәм хезмәт күрсәтүдә катнашучы башка затлар, вакцинага каршы медицина күрсәтмәләре бар дип медицина оешмасы тарафыннан расланган белешмәгә (медицина бәяләмәсенә) ия затлардан тыш, яңа коронавирус инфекциясенә каршы вакцинация узган булса, андыйлар 70% тулылык белән эшли ала. Шулай ук, әгәр чарада коронавируска каршы вакцинация узуны яки соңгы алты ай эчендә авырганын раслый торган QR-кодлары булган 18 яшьтән өлкәнрәк кешеләр катнашса.

Шушы ук таләпләр сакланган очракта спорт, һәм күңел ачу чараларын да үткәрергә мөмкин.

Аларны оперштаб белән кимендә 30 көн кала килештерергә кирәк.

Чикләүләр шулай ук кунакханәләргә һәм хостелларга да кагылачак, алар номер фонды 50%-тан да артык тулмаган очракта эшли ала. Вакциналаштыруга каршы медицина күрсәтмәләре справка белән расланган кешеләрдән тыш, барлык хезмәткәрләр дә коронавируска каршы прививка ясаткан булса, тулы көчкә эшләү мөмкин.

Җәмәгать туклануы объектларына, спортзалларга, бассейннарга, аквапаркларга, сәүдә залы 400 кв.метрдан артык мәйданлы сәүдә-күңел ачу үзәкләре һәм азык-төлек сатмый торган кибетләргә килүчеләр соңгы алты айда COVID-19 белән авырганын раслый торган яки вакцинацияләнгәне турында гамәлдәге QR-кодны күрсәтергә тиеш булачак.

Аннары, COVID-19-га каршы вакцинацияләнмәгән яисә соңгы алты ай эчендә бу чирне кичермәгән 65 яшьтән өлкәнрәкләр өчен мәҗбүри үзизоляция режимы кертелә. Кагыйдә кешегә ашыгыч (кичектергесез) медицина ярдәме кирәк булган һәм тормышына һәм сәламәтлегенә турыдан-туры куркыныч янаган очракта, коронавирус инфекциясенә каршы вакцинация узу урынына, иң якындагы товарлар сатып алу, хезмәт күрсәтүләр, йөрү яки йорт хайваннарын йөртү өчен, кешеләр күпләп була торган урыннардан тыш, яшәү (тору) урыныннан 100 метрдан да артмаган ераклыкта мөрәҗәгать иткән очракта, шулай ук чүп ташлау өчен чыкканда гамәлдә түгел.

Эш бирүчеләр мондый хезмәткәрләрне дистанцион эш форматына күчерергә яки 65 яшьтән өлкәнрәкләр өчен күрсәтелгән чикләүләрне үтәүне тәэмин итүче башка чаралар күрергә тиеш.

Искәртеп узабыз, элегрәк ТР буенча Роспотребнадзор идарәсендә көз җитү белән Татарстанда санитар-эпидемиологик хәл начарланды, вакцинация темплары кимеде, дип хәбәр иттеләр.

Шулай ук укыгыз

Барлык яңалыклар