Казанның контейнер мәйданчыкларыннан 85-90% чүп чыгарылган

«ПЖКХ» ИК бар булган техника резервын һәм 19 берәмлек арендага алынган машинаны кулланган

Фото: Денис Гордийко

«ПЖКХ» ИК бүгенге көнгә Казанның контейнер мәйданчыкларыннан калдыкларның 85-90% ын алып чыккан. Барлык хезмәтләр тәүлек әйләнәсе эшли, шул исәптән чүп ташу техникасы да. Ике көн эчендә кискен җылыну аркасында 35 машина кар өеменә кереп баткан, тагын алтысы юл-транспорт һәлакәтенә эләккән, бу план күрсәткечләренә чыгуга комачаулый. Бу хакта регоператорның генераль директоры урынбасары Альмир Корбанов кар җыю буенча штаб утырышында хәбәр итте.

Ул искәрткәнчә, көн саен линиягә 38 берәмлек махсус техника чыга – бу гадәти күрсәткечләрдән 20% ка күбрәк. Барлык булган резерв җәлеп ителгән.

«Контейнер мәйданчыклары янындагы чүп өемнәрен бетерү өчен өстәмә рәвештә 16 берәмлек үз техникасы һәм арендага алынган машиналар җәлеп ителә: 12 үзбушаткыч, биш йөк төягеч, ике ломовоз», – дип җиткерде спикер.

Район администрацияләре һәм идарәче компанияләр белән берлектә регоператор проблемалы участокларны эшкәртә, техниканың бару маршрутларын актуальләштерә.

«Күп чүп өемнәре барлыкка килгән урыннар табылганда машиналар оператив рәвештә шушы адресларга җибәрелә. Чүпне бетерү буенча ситуацияне контрольдә тотабыз», – дип билгеләп үтте Альмир Корбанов. Ул регоператорның Telegram-каналына каты көнкүреш калдыкларны чыгаруга 400 дән артык мөрәҗәгать килүен өстәде.