30 декабрьдән 8 гыйнварга кадәр Казанның стационар һәм бала тудыру йортлары тәүлек буе эшләячәк

Сырхауханәләрнең эше бәйрәм графигы буенча 9.00 сәгатьтән 17.00 сәгатькә кадәр оештырылачак.

(Казан шәһәре KZN.RU, 24-нче декабрь, Ксения Швецова). Шәһәрнең стационарлары һәм бала тудыру йортлары бәйрәм көннәрендә 2019 елның 30 декабреннән 8 гыйнварына кадәр тәүлек буе эшләячәк. Пациентларны госпитализацияләү авыруның профиленә карап территориаль принцип буенча гамәлгә ашырыла. Яңа ел бәйрәмнәрендә медицина ярдәмен оештыру турында бүген эшлекле дүшәмбе киңәшмәсендә ТР Сәламәтлек саклау министрлыгының Казан буенча Сәламәтлек саклау идарәсе башлыгы Илнар Хәлфиев сөйләде.

Хатын-кызлар консультацияләре 3 һәм 6 гыйнварда, өлкәннәр поликлиникалары – 30 декабрьдә якшәмбе графигы буенча - 9.00 сәгатьтән 15.00 сәгатькә кадәр, 31 декабрьдә шимбә графигы буенча 8.00 сәгатьтән 18.00 сәгатькә кадәр эшләячәк.

1 гыйнвардан башлап 8 гыйнварга кадәр сырхауханәләрнең эше бәйрәм графигы буенча 9.00 сәгатьтән 17.00 сәгатькә кадәр оештырылачак, аларда дежур терапевтик бригадалар эшләячәк. 3, 6 гыйнварда өстәмә рәвештә тар профиль белгечләре чыгачак, рентгенология кабинеты, лаборатория, көндезге эш режимы белән травматология пункты эшләячәк, дип хәбәр итте Илнар Хәлфиев. Бәйрәм көннәрендә тәүлек буе эшләү режимы булган травмпунктлар яшәү урынына бәйсез рәвештә беренчел мөрәҗәгатьләр белән пациентларны кабул итәчәк.

Балалар сырхауханәләре 30 декабрь, 1, 6 һәм 7 гыйнварда якшәмбе графигы буенча 9.00 сәгатьтән 15.00 сәгатькә кадәр чакырулар хезмәте күрсәтмичә эшләячәк, аларда кичектергесез сәбәпләр һәм кискен авырулар буенча балаларны кабул итәчәк дежур бригада эшләячәк. Шулай ук ата-аналар балалар стационарының кабул итү бүлегенә мөрәҗәгать итә яки ашыгыч медицина ярдәме бригадасын чакырта алалар. Калган көннәрдә сырхауханәләрнең эше шимбә җәдвәле буенча 9.00 сәгатьтән 17.00 сәгатькә кадәр, чакырулар кабул итү – 16.00 сәгатькә кадәр оештырылачак. 2 һәм 5 гыйнварда балалар сырхауханәләренең эше көчәйтелгән режимда оештырылачак, кабул итүне табиб-педиатрлар, лор-табиблар, офтальмологлар, хирурглар алып барачак, лаборатория эше оештырылачак. Балалар травматологиясе ярдәме 31 декабрьдә, 3 һәм 6 гыйнварда 9.00 сәгатьтән 17.00 сәгатькә кадәр 1-нче номерлы Балалар хастаханәсенең травмпунктында, калган көннәрдә БРКХ "Азино" сырхауханәсендә травмпунктта оештырылачак.

"Якын-тирә дәвалау оешмалары турында бөтен сырхауханәләрнең регистратураларында мәгълүмат бар. Стоматология сырхаухынәләре көн саен 9.00 сәгатьтән 15.00 сәгатькә кадәр эшләячәк", - дип сөйләде И.Хәлфиев һәм 30 декабрьдә 8.00 дән 15.00 сәгатькә кадәр 2-нче Юго-Западная урамындагы 1-нче номерлы балалар стоматология сырхауханәсендә, ә 31 декабрьдә Ямашев проспектындагы 2-нче балалар стоматология сырхауханәсендә кабул ителәчәк, дип өстәде. Моннан тыш, кичектергесез стоматология Чернышевский ур., 10/6 адресы буенча тәүлек буе барлык бәйрәм көннәре эшли.

30 декабрьдән 8 гыйнварга кадәр сәламәтлек саклау идарәсе буенча җаваплы дежур – ашыгыч медицина ярдәме станциясенең өлкән табибы эшләячәк, шулай ук республика һәлакәтләр медицинасы үзәгенең тәүлек буе эшли торган кайнар линия телефоны оештырылачак: (843) 293-49-95.

"Республика шәһәр һәм район бәйрәм чараларын медицина белән тәэмин итү ашыгыч медицина ярдәме, шулай ук шәһәрнең амбулатор поликлиника оешмаларының мобиль бригадалары тарафыннан оештырылачак", - дип йомгаклады И.Хәлфиев.