1 гыйнвардан Татарстанда балалар бакчаларында ата-аналар түләве 4 процентка артты

1 гыйнвардан Татарстанда балалар бакчаларында ата-аналар түләве 4 процентка артты

<p> (Казан шәһәре KZN.RU, 19-нчы гыйнвар, Алсу Сафина). 2018 елның 1 гыйнварыннан Татарстанда балалар бакчаларында баланы караган өчен ата-ана түләве 4 процентка артты. Бу хакта бүген “Татар-информ” мәгълүмат агентлыгында узган пресс-конференциядә ТР мәгариф һәм фән министрының беренче урынбасары Илсур Һадиуллин хәбәр итте. </p> <p> Ул хәбәр иткәнчә, ата-ана түләве арту мәктәпкәчә белем бирү оешмалары эшчәнлеген финанс ягыннан тәэмин итү чыгымнары, шул исәптән туклану продуктларына, хуҗалык-көнкүреш товарларына бәяләр, хезмәт күрсәтүче персоналның хезмәт хаклары арту белән бәйле. </p> <p> Төркем төренә, эш режимына һәм балаларның яшенә карап, бәяләр арту 104 сумнан 187 сумга кадәр тәшкил итә, дип аңлатты ул. “Һәр балалар бакчасында, һәр төркемдә, диярлек ата-ана түләве 4 процентка артты”, - дип ассызыклады республика мәгариф һәм фән министры урынбасары. </p> <p> Илсур Һадиуллин мисал китерде: Казан балалар бакчаларының иң таралган төрендә – 3 яшьтән 7 яшькә кадәрге балалар өчен 10,5 сәгатьлек гомуми белем бирү төркемендә ата-аналар түләве 120 сумга артты һәм 3117 сум тәшкил итә. </p> <p> Ул искәртеп үткәнчә, балалар бакчасы өчен түләү өчен барлык федераль, республика һәм муниципаль ташламалар сакланып кала. “Мәгариф турында” федераль закон буенча инвалид балалар, туберкулездан агуланган балалар, ятим балалар һәм ата-ана каравыннан мәхрүм калган балалар бакчаларга бушлай йөри. </p> <p> Моннан тыш, республика күләмендә күп балалы гаиләләргә ташламалар каралган – алар билгеләнгән ата-ана түләвенең 50 процентын түли. </p> <p> Моннан кала, балалар бакчаларында тәрбияләнүчеләрнең ата-аналары ата-ана түләве өлешеннән компенсация ала ала. Федераль закон тарафыннан бу күрсәткеч беренче балага уртача ата-ана түләвеннән 20% тәшкил итә, икенче балага – 50%, өченче һәм аннан соңгы балага – 70%. “Әлеге компенсация, гаиләнең матди хәленә карамастан, барлык кешегә дә түләнә”, - дип аңлатты И.Һадиуллин. Билгеләп үтәргә кирәк, балалар бакчаларында баланы караган өчен ата-ана түләвенең уртача зурлыгы ел саен ТР Министрлар кабинеты карары белән билгеләнә. </p> <p> Компенсацияне алу өчен түбәндәге документлар кирәк: бала туу турында таныклык копиясе, балалар бакчасы белән килешү, квитанцияләр. Әлеге документлар социаль яклау органнарына бирелә, шуннан соң банкта исәп-хисап счеты ачыла. </p> <p> Тагын бер компенсация муниципаль дәрәҗәдә каралган. Ул гаиләдә бер кешегә керем күләме 20 меңнән ким булган гаиләләргә каралган, моның өчен, алда әйтеп үтелгән документардан кала, барлык гаилә әгъзаларының соңгы 3 ай өчен хезмәт хакы турындагы белешмә дә кирәк булачак. </p>

2018-01-19T15:05:00+0300