1 июльдән лицензия булмаган өчен пассажирлар йөртүчеләргә штраф салыначак

Хокук бозучылар өчен 400 мең сумга кадәр административ җәза чаралары каралган.

(Казан шәһәре KZN.RU, 1-нче июль, Ксения Швецова). 1-нче июльдән лицензиясез пассажирлар йөртүне гамәлгә ашыра торган транспорт компанияләре штрафка тартылачак. Хокук бозучылар өчен 400 мең сумга кадәр административ штраф, ә кабат хокук бозган өчен – автотранспортны конфискацияләү каралган, дип хәбәр итте бүген эшлекле дүшәмбе вакытында Транспорт комитеты рәисе Айдар Габделхаков.

Үз ихтыяҗлары өчен һәм заказ буенча 8 кешедән артык сыйдырышлы автобуслар белән пассажирлар йөртүне лицензияләү федераль закон нигезендә кертелде, ул 1-нче мартта үз көченә керде, дип искәртте спикер. Әлеге таләп көч ведомстволары, Гадәттән тыш хәлләр министрлыгы һәм башка ашыгыч рәвештә ярдәм күрсәтү хезмәтләре автобусларына гына кагылмый. Лицензия алу өчен йөртүчеләргә120 көн вакыт бирелде.

«Вакыт бетте, һәм бүгенге көннән лицензия алмаган транспорт йөртүчеләр өчен административ җәза чаралары каралган. Бу - 400 мең сумга кадәр штраф, ә кабат хокук бозган өчен – автотранспортны конфискацияләү», – дип аңлатты А.Габделхаков.

Спикер сүзләренә караганда, шәһәрнең муниципаль автобус маршрутларына хезмәт күрсәтә торган транспорт предприятиеләре бүгенге көндә федераль закон таләпләрен тулысынча үтәде һәм гамәлдәге лицензияләрне яңа үрнәктәге лицензияләргә алыштырды.

Фоторепортаж

Эшлекле дүшәмбе, 01.07.2019

Шулай ук укыгыз

Барлык яңалыклар