2024 елның 1 нче июленнән коммуналь хезмәтләр өчен түләү тарифлары үзгәрәчәк

Татарстанда түләү үсешенең чик индексы 10,8% дәрәҗәсендә көтелә

Фото: Денис Гордийко

(Казан шәһәре KZN.RU, 5 нче декабрь, Диана Жиленкова). 2024 елның 1 нче июленнән Россиянең барлык төбәкләрендә коммуналь хезмәтләргә тарифларны планлы индексацияләү булачак. Хәзерге тарифлар ел ярым дәвамында үзгәрмәде. Татарстан халкы өчен түләү үсешенең чик индексы 10,8% дәрәҗәсендә көтелә, рөхсәт ителгән чик тайпылыш – 4,9%. Бу хакта Татарстан Министрлар Кабинетында узган брифингта ТР Тарифлар буенча дәүләт комитеты рәисе Александр Груничев хәбәр итте.

«Әлеге күрсәткечләр республика өчен уртача 913 муниципаль берәмлекне һәм җиде коммуналь хезмәтне исәпкә алып кабул ителде. Шуңа күрә билгеләгән уртача процентлар азрак һәм зуррак якка тайпылырга мөмкин. Әмма барлык коммуналь хезмәтләрнең уртача бәясе без 2023 елга игълан иткән һәм 2024 елга планлаштырган күләмнән артмаска тиеш», – дип билгеләп үтте спикер.

Тарифларны арттыруның төп факторлары дип Александр Груничев энергетика ресурсларына бәяләр артуны, икътисадның бюджеттан тыш секторында минималь хезмәт хакы күләмен, федераль һәм республика программалары буенча төзелгән яңа объектларны эксплуатацияләү чыгымнарын исәпкә алуны, шулай ук куллану бәяләре индексын арттыруны атады.

Тарифларны исәпләү экспертлар тарафыннан тарифларны көйләү өлкәсендәге федераль закон нигезендә һәм ил хөкүмәте тарафыннан расланган Россиянең социаль-икътисади үсеше фаразы күрсәткечләрен исәпкә алып башкарыла.

Халык өчен газның фаразланган бәясе 1 нче июльдән 7,54 сум/кубометр (+11,2%) тәшкил итәчәк. Электр энергиясенә тарифларны шәһәр өчен 5,09 сум/кВтч күләмендә билгеләү планлаштырыла (+8,8%). «Закон нигезендә тариф кампаниясен без агымдагы елның 20 нче декабренә кадәр тәмамлаячакбыз», – дип йомгаклады ТР Тарифлар буенча дәүләт комитеты рәисе.

Төзелеш, архитектура һәм торак-коммуналь хуҗалык министрының беренче урынбасары Алексей Фролов ассызыклаганча, җылылык энергиясенә тарифлар үзгәрүе көтелми, әмма бу атнада һава температурасының кискен төшүен исәпкә алырга кирәк. Шуңа бәйле рәвештә җылылык энергиясен күп куллану фаразлана.

Татарстанда торак-коммуналь хезмәтләр өчен түләгәндә халыкка социаль ярдәм чаралары системасы эшли, дип искәртте республика Хезмәт министрлыгы башлыгы урынбасары Наталья Бутаева. Алар арасында гражданнарның аерым категорияләре (ветераннар, инвалидлар һ.б.) өчен субсидия-ташламалар бар, аларның күләме 50% тәшкил итә, күп балалы гаиләләр өчен – 30%.

«Әгәр торак һәм коммуналь хезмәтләр өчен түләү чыгымнары гаилә кеременең 21% тан артып китсә, социаль яклау органнары рөхсәт ителгән күләм белән фактик күләм арасындагы аерманы каплый. Компенсация алу хокукына кулланучылар, яллаучылар, бина хуҗалары ия», – дип сөйләде Наталья Бутаева.

Тарифларны 7 коммуналь хезмәт күрсәтүгә билгелиләр: газ белән тәэмин итү, электр белән тәэмин итү (бөтен республика өчен бердәм тарифлар); каты коммуналь калдыклар белән эш итү (ике зона буенча тарифлар: Көнбатыш һәм Көнчыгыш); җылылык белән тәэмин итү, салкын су белән тәэмин итү, кайнар су белән тәэмин итү, су чыгару (оешманың технологик һәм техник үзенчәлекләренә карап индивидуаль тарифлар). Тарифларны шулай ук мич җылытуга да билгелиләр, Татарстанда мондый хезмәтләрдән 5657 йортта яшәүчеләр файдалана.

Шулай ук укыгыз

Барлык яңалыклар