Рөстәм Миңнеханов һәм Илсур Метшин «Шәһәрне төзекләндерү» муниципаль унитар предприятиесе базасы һәм «Горводзеленхоз» теплицасы эше белән таныштылар

Алар төзекләндерү блогын, бозлавыкка каршы материалларны саклау өчен каралган склад бүлмәләрен, шулай ук административ-көнкүреш корпусын карадылар

Денис Гордийко фотосы

Бүген Татарстан рәисе Рөстәм Миңнеханов һәм Казан мэры Илсур Метшин Воровский урамында урнашкан «Шәһәрне төзекләндерү» муниципаль унитар предприятиесенең яңартылган җитештерү базасы һәм Даурия урамындагы «Горводзеленхоз» муниципаль унитар предприятиесенең яңа теплица комплексы эше белән таныштылар.

Моңа кадәр Гривка урамында эшләгән «Шәһәрне төзекләндерү» муниципаль унитар предприятиесе базасы әле күптән түгел генә Воровский урамына күченгән. Участокның мәйданы 2,2 тапкырга – 2,4 гектарга зурайган. Оешманың мәйданы артуы төзекләндерү хезмәтләрен, складларны һәм көнкүреш биналарын бер ноктага берләштерергә мөмкинлек биргән.

Предприятие Авиатөзелеш, Яңа Савин, Киров һәм Мәскәү районнарында 4,4 миллион квадрат метр юлга хезмәт күрсәтә. Җылы төзекләндерү зонасында бер үк вакытта 12 берәмлеккә кадәр авыр юл техникасына хезмәт күрсәтелә. Биредә 15 мең тонна реагентны саклау өчен складлар, 250 хезмәткәргә душ бүлмәләре һәм ял бүлмәләре булган административ корпус төзелгән. Яңа базада заманча күтәртү җайланмалары, токарь һәм бораулау станоклары, компрессорлар һәм шиномонтаж җиһазлары сатып алынган. Ремонт эшләрен предприятиенең штатлы автомеханиклары башкара.

«Шәһәрне төзекләндерү» муниципаль унитар предприятиесе балансында 132 берәмлек махсус техника, шул исәптән кышкы юлларны карап тоту өчен 78 машина исәпләнә. 2025 елда сигез яңа берәмлек техника сатып алынган. Барлык техниканы да хәрәкәтне күрсәтеп тора торган контроль системасы белән җиһазландырганнар.

Эшлекле сәфәрне Татарстан рәисе һәм Казан мэры Даурия урамында урнашкан «Горводзеленхоз» муниципаль унитар предприятиесе комплексында дәвам итте. 11,5 мең квадрат метр мәйдандагы яңа теплицалар 1980 елларда төзелгән иске корылмаларны алыштырган.

Яңа объектның төп аермасы – биредә эшләр тулысынча автомат рәвештә башкарыла. Үсентеләрне әзерләүнең роботлаштырылган линиясе җитештерүчәнлекне 10 тапкырга арттырырга мөмкинлек биргән: хәзер биредәге җайланмалар ярдәмендә сәгатенә орлык чәчелгән 86,5 мең кассета әзерләнә. Комплексның проект куәте, елына шәһәр киңлекләрен яшелләндерү өчен, төрле сорттагы, шул исәптән 1 миллион лалә чәчәген дә кертеп, 2 миллионга кадәр чәчәк үстерергә мөмкинлек бирә. Климат белән идарә итү системасы һәм тамчылап су сибү автомат режимда эшли. Хәзер чәчәкләрне ел буе үстерергә була.

Җитештерү куәтеннән тыш, комплекс территориясендә хезмәткәрләр өчен заманча ашханәсе булган яңа административ-көнкүреш бина төзелгән. Бинага суыткыч, микродулкынлы мич, чәйнек урнаштырылган, шулай ук душ, гардероб бүлмәләрен һәм ял почмагын күрергә була.

Яңартылган инфраструктуралар белән танышу сәфәрендә шулай ук Казан муниципаль берәмлеге башлыгының беренче урынбасары Денис Калинкин, Вахитов һәм Идел буе районнары башлыгы Альберт Салихов, Башкарма комитет җитәкчесе урынбасары Игорь Куляжев, Тышкы төзекләндерү комитеты рәисе Альберт Шәйнуров, «Горводзеленхоз» тресты муниципаль унитар предприятиесе директоры Роза Җаббарова катнашты.

Фоторепортаж

Шулай ук укыгыз

Барлык яңалыклар