Ретро-машиналар һәм винтаж пальто: Казанда «Айда!» документаль фильмны төшерә башладылар

Бу процесста шәһәрнең үзәк урамнары җәлеп ителгән — монда берничә эпизод төшерү планлаштырыла

Бүген Татарстан башкаласы «АЙДА!» күпсерияле фильмга төшерү мәйданчыгына әйләнгән. Кинопроектның төп өлеше өстендә эш Мәскәүдә узачак, Казанда исә берничә күренеш төшерү планлаштырыла. Тарихи атмосфераны торгызу өчен кинопроцесс кысаларында шәһәр урамнарында вакытлыча юл билгеләрен, куркынычсызлык коймаларын, шулай ук реклама белдерүләрен һәм элмә такталарны сүткәннәр.

Команда беренче урынны иртә таңнан әзерли башлады — төшерүләр Беренче Май мәйданында башланды. Мәйданчыкка керү тулысынча ябылган, шуңа күрә шәһәр халкы, метродан чыккач, эш һәм уку урыннарына кадәр яңа маршрутлар төзегән.

Беренче Май мәйданы бер сәгать эчендә үзгәрде һәм Совет тарихына күчерелде: биредә зур тәгәрмәчле ретро-машиналар һәм ретро-коляскалар, винтаж пальтолар һәм баш киемнәре күрергә мөмкин иде. Җирле халык төрлечә җавап кайтарды, ләкин бу хәлгә битарафлар булмады: кемдер төшерү төркеменең эшенә комачауларга теләмичә үтеп китте, ә башкалар процессны ерактан телефоннарга төшерергә, нинди дә булса кызыклы детальләрне тотып алырга тырышты.

Кинокартинаның вакыйгалары 1970-1980 елларда бара. Фильм Татарстан АССР хокук сакчылары һәм беренче эре совет оешкан җинаятьчел төркем «Тяп-Ляп» каршылыгы турында сөйли.

Беренче күренешне Муса Җәлил һәйкәле янында төшерделәр. Алга таба командага оператив рәвештә тагын өч сәхнә өчен мәйданчыкларны алыштырырга һәм әзерләргә кирәк булачак – алар Лобачевский урамы һәм Казан федераль университеты территориясендә җәелдереләчәк. Моннан тыш, Казанның күренекле урыннарын төшерү планлаштырыла, әмма аларны иртәгә үк уздырачаклар.

Кинокартинаның режиссеры Олег Асадулин. Ул «Закрытая школа», «Фобос. Клуб страха», «Темный мир. Равновесие», «Возвращение попугая Кеши» фильмнары белән танылган. Продюсерлар — Тимур Вайнштейн һәм Яков Тесис.

Сериалда рольләрне Владимир Вдовиченков, Никита Кологривый, Даниил Воробьев, Екатерина Климова, Алексей Онежен, Джульетта Геринг кебек танылган артистлар башкара. Төшерүдә шулай ук Г.Камал исемендәге театрның Хәлимә Искәндәрова һәм Илдус Әхмәтҗанов актерлары да катнашачак.

Фильмның премьерасы 2025-2026 елларга планлаштырылган.

Казан күп тапкырлар эре кинопроектлар төшерү урынына әверелде. Мәсәлән, элегрәк шәһәрне «Зөләйха күзләрен ача» сериалы, «Самый лучший день» караоке-комедиясе, «Сокровища О.К.» маҗаралы фильмы, «Реальная сказка» кинокартинасы, «Неотложка» күп серияле тасмасы, «Елки» фильмнары сериясе һәм башкалар өчен сайлаганнар иде.

Исегезгә төшерәбез, төшерү процессына бәйле Казан үзәгендә юлларны өлешчә яптылар һәм транспорт хәрәкәтен чикләделәр. Вакыйга шәһәрнең үзәк урамнарын колачлый. Хәрәкәт 20:00 гә кадәр вакыты-вакыты белән түбәндәге участоклар буенча ябылачак:

- Кремль урамында, Университет урамыннан Беренче Май мәйданына кадәр;

- Чернышевский урамында, Профсоюз урамыннан Дзержинский урамына кадәрге участокта;

- Муса Җәлил урамында, Профсоюз урамыннан Дзержинский урамына кадәрге участокта;

- Кави Нәҗми урамында, Профсоюз урамыннан Дзержинский урамына тиклем;

- Астрономия урамы буйлап, Профсоюз урамыннан Кремль урамына кадәрге участокта;

- Лобачевский урамы буйлап, Кремль урамыннан Дзержинский урамына тиклем;

- Университет урамында, Профсоюз урамыннан Кремль урамына тиклем;

- Профессор Нужин урамында, Пушкин урамыннан Кремль урамына кадәр.

Шулай ук укыгыз

Барлык яңалыклар