Республикакүләм ифтар быел яңа форматта узачак

Рамазан аенда азык-төлек җыелмалары мохтаҗларның өйләренә китереләчәк.

(Казан шәһәре KZN.RU, 23-нче апрель). Быел санитар-эпидемиологик шартларга бәйле рәвештә республика ифтары яңа форматта узачак. Рамазан ае дәвамында ифтар-җыелмалар мохтаҗларның өйләренә китереләчәк.

VIII Республика ифтары ТАССР оешуның 100 еллыгына багышланачак. Ифтар 24-нче апрельдә, уразаның беренче көнендә старт ала. Көн саен «Ак Барс Арена» стадионы һәм «Туган Авылым» милли-туристлык комплексы территорияләрендә 1000-әр ифтар-җыелма формалаштырылачак. Аларны, алга таба мохтаҗларның өйләренә илтеп тапшыру өчен, ТР мөселманнары Диния нәзарәтенең «Зәкят» хәйрия фондына, Казан мәчетләре имамнарына һәм Татарстан районнары мөхтәсибләренә тапшырачаклар. Оештыручылар, ифтар-җыелмаларны әзерләгәндә һәм илтеп тапшырганда, коронавирус инфекциясе таралуны булдырмау буенча барлык чаралар күреләчәк, дип ышандыралар.

Теләге булган һәркем мохтаҗларга ярдәм итә алачак. Ифтар-җыелмаларны формалаштыруга акчаларны «ИФТАР буш ара СУММА» тексты белән 7715 номерына җибәрергә була. Мәсәлән: «ИФТАР 300».

Быел дини йола Татарстанда яшәүчеләрнең рекордлы санын - 30 меңгә кадәр кешене колачлар, дип көтелә. Чагыштыру өчен, узган ел республика ифтарында 15 мең мөселман булган.

Быел ифтарны оештыручылар буларак ТР Диния нәзарәте, «Ак Барс Арена» стадионы һәм «Туган Авылым» милли-туристлык комплексы чыгыш ясый, дип хәбәр итә ТР мөселманнары Диния нәзарәте матбугат хезмәте.

Шулай ук укыгыз

Барлык яңалыклар