Кадыш һәм Константиновка бистәләрендәге күперләрне төзекләндерүне октябрьдә тәмамларга планлаштыралар

Авария хәлендәге корылмаларны тулысынча үзгәртеп корганнар

Киләсе айда Казанда Кадыш һәм Константиновка бистәләрендәге күперләрне төзекләндерү төгәлләнәчәк. Корылмалар 30 елдан артык хезмәт иткән һәм авария хәлендә булган. Күперләр комплекслы рәвештә төзекләндереләчәк — йөрү юллары киңәйтеләчәк, коймалар урнаштырылачак, яңгыр сулары канализациясе җиһазландырылачак. Эшләр җәдвалдан алда башкарыла.

Кадыш бистәсендә Солонка елгасы аша күперне төзекләндерүне апрельдә башлаганнар. Объектта 15 белгеч, өч берәмлек техника эшли. Бүгенге көндә төзүчеләр күчеш плитәләрен һәм күпернең терәкләрен яңарттылар, элемтә челтәрләрен төзекләндерделәр. Хәзерге вакытта алар сөзәк урыннарны ныгыталар һәм яр терәкләренә таянычларны бетонлыйлар, якынлашу юлларында су агызу юлларын төзекләндерәләр. Эшләр 20—50% ка башкарылган. Күперне тергезүне 2025 елның июлендә тәмамларга ниятләгәннәр иде, әмма төзүчеләр җәдвалдан алда эшли – яңарту октябрьдә тәмамланачак.

Төзекләндерү нәтиҗәсендә күпернең озынлыгы 32,2 метрга (+5,65 м) кадәр артачак. Тротуарлар 1,2 метрдан 1,5 метрга кадәр, ә йөрү юлын 7 метрдан 8 метрга кадәр ике куркынычсызлык буе хисабына киңәйтәчәкләр. Күпердә, күчеш плитәләре янында һәм якынлашу юлларында 75 см биеклектәге барьер киртәләр урнаштырылачак. Шулай ук объектта чистарту корылмалары белән яңгыр сулары канализациясе һәм тоткалы баскычлар барлыкка киләчәк.

Исегезгә төшерәбез, күперне 1974 елда төзегәннәр. «ТР Главтатдортранс» ДКУ заказы буенча 2022 елда корылманы тергезү өчен документлар эшләнде. Генераль подрядчы булып «Волга-Автодор» ҖЧҖ тора.

Константиновка бистәсендә Вертелевка елгасы аша күперне төзекләндерү ахырга җитеп бара, анда да эшләр апрельдә башланган. Проектта күперне юл эчендә су үткәргеч торбага тулысынча үзгәртеп кору каралган. Бүгенге көндә төзүчеләр свайлы басу булдырганнар, су үткәрү торбасын һәм аның башлыкларын җиһазлаганнар, су белән тәэмин итү, элемтә һәм электр белән тәэмин итү челтәрләрен салганнар. Якын килү юлларын фрезерлау дәвам итә, тротуарларны төзү эшләре 60—70% ка тәмамланган.

Объектта 10 кешедән торган бригада эшли, дүрт берәмлек махсус техника кулланыла. Күперне тергезүне билгеләнгән вакыттан бер ай алдан тәмамларга планлаштыралар.

Элегрәк хәбәр ителгәнчә, төзекләндерү нәтиҗәсендә корылманың үткәрү мөмкинлеге артачак: хәрәкәт буйлары саны икегә кадәр артачак, машина йөрү юлы 7 метрга кадәр киңәйтеләчәк, ян-якларында өстәмә рәвештә ике куркынычсызлык буйлары җиһазландырылачак. Элек аерым күпер булган тротуар хәзер төп төзелешкә керәчәк. Чистарту корылмалары һәм яктырткычлары булган яңгыр сулары канализациясе барлыкка киләчәк. Култыксаларны торба урнашкан зонада һәм якын килү урыннарында 85 см биеклектәге парапет киртәгә алыштырачаклар.

Вертелевка елгасы аша күперне 1990 елда төзегәннәр. Төзекләндерү өчен документларны «ТР Главтатдортранс» ДКУ әзерләгән, генераль подрядчы шулай ук «Волга-Автодор» ҖЧҖ, дип хәбәр иттеләр Тышкы төзекләндерү комитетында.

Исегезгә төшерәбез, быел шулай ук Миллениум күперен яңарттылар. 20 ел эчендә беренче капиталь ремонт БРИКС саммитына әзерлек барышында үткәрелде. Объектта гидроизоляцияне торгызганнар, юл өслегенең барлык катламнарын алыштырганнар, яктырткычлар урнаштырганнар, шулай ук аралык корылмаларын өлешчә төзәткәннәр.

2020 елдан Казанда барлыгы 11 күпер һәм юлүткәргеч төзелде, төзекләндерелде һәм тергезелде. 2023 елда рекорд куелган – бер үк вакытта эш алты корылмада барган. Киндерле, Хуҗәмәт, Борисоглебское торак массивларында, Назарбаев урамында күперләр яңартылды һәм төзәтелде.

Шулай ук укыгыз

Барлык яңалыклар