Дәрвишләр бистәсендә балалар поликлиникасын төзү буенча эшләр 40% ка башкарылган

Бүгенге көндә бинаның стеналары бетонланган, гидроизоляцияләнгән һәм фундамент җылытылган.

Фото: ТР Сәламәтлек саклау министрлыгының матбугат хезмәте

(Казан шәһәре KZN.RU, 19 нчы август). Казанның Дәрвишләр бистәсендә балалар поликлиникасын төзү эшләре 40% ка башкарылган. Яңа медицина учреждениесендә заманча амбулатор педиатрия өчен кирәкле бөтен нәрсә булачак.

Медучреждение төзелеше бу елның апрелендә башланды. Әлеге вакыт эчендә белгечләр дүрт каттагы диварларны һәм тәрәзәләрне бетонладылар, гидроизоляция ясадылар һәм фундамент стеналарын җылыттылар. Хәзер тышкы диварларны салу һәм армияләү эшләре бара, бу эшләр 60% ка башкарылган, дип хәбәр итә ТР Сәламәтлек саклау министрлыгының матбугат хезмәте. Моннан тыш, белгечләр тышкы инженерлык челтәрләрен сузу эшләрен дәвам итә. Яңа балалар поликлиникасы беренче пациентларны киләсе елда ук кабул итәр дип планлаштырыла.

Совет районында яшәүчеләргә хезмәт күрсәтүче 6 нчы номерлы балалар поликлиникасының филиалы төзелеше «Сәламәтлек саклау» илкүләм проекты буенча алып барыла. Гомуми мәйданы 6,4 мең кв. метр булган биш катлы бина (4 дәвалау каты һәм бер техник) сменага 180 кеше кабул итә алачак. Медицина учреждениесендә 245 кә якын хезмәткәр – педиатрлар һәм тар профильле табиблар эшләячәк.

Балалар поликлиникасының филиалы травматология пункты, йогышлы авырулар блогы, лаборатория һәм көндезге стационар булган күп функцияле учреждение булачак, ул көненә 15 баланы кабул итә алачак. Поликлиникага Дәрвишләр бистәсендә һәм күрше торак массивларда яшәүче балалар йөриячәк.

Шулай ук укыгыз

Барлык яңалыклар