Р.Миңнеханов һәм И.Метшин сугыш ветераны Маһьян Камаевны Җиңү көне белән котладылар

Кунаклар ветеранга нык сәламәтлек һәм озын гомер теләделәр.

(Казан шәһәре KZN.RU, 9-нчы май). Бүген Татарстан Республикасы Президенты Рөстәм Миңнеханов һәм Казан Мэры Илсур Метшин Бөек Ватан сугышында катнашучы Маһьян Камаевны Бөек Җиңүнең 75 еллыгы белән котлап кайттылар. Ветеранга нык сәламәтлек һәм озын гомер теләделәр.

Маһьян Камай улы Камаев 1944 елда армиягә чакырылган. Ерак Көнчыгышта артиллерия бригадасында хезмәт иткән, Япония белән сугышта катнашкан. Батырлыклары өчен II дәрәҗә Ватан сугышы ордены һәм «Японияне җиңгән өчен» медале белән бүләкләнгән. Бүген ул Казанда хатыны Мөнирә Миңнеәхмәт кызы белән яши.

Маһьян Камаев республика җитәкчелегенә ветераннарга күрсәткән игътибарлары һәм төрлечә ярдәмнәре өчен рәхмәт белдерде, дип хәбәр итә ТР Президенты матбугат хезмәте.

Искәртәбез, быел, федераль түләүләргә өстәп, Татарстан Президенты ветераннарга бер мәртәбәлек республика ярдәме турында карар кабул итте. Сугышта катнашучыларга, нацист концлагерьларының балигъ булмаган тоткыннарына һәм «Ленинград блокадасында яшәүче» тамгасы белән бүләкләнгән затларга – 25-әр мең сум. Моннан тыш, республика бюджетыннан 5-әр мең сум тыл хезмәтчәннәренә һәм сугышта катнашучыларның тол хатыннарына бирелә.

Шулай ук укыгыз

Барлык яңалыклар