Р.Гафаров: «Волонтерлар штабларының эше актуальлеген югалтмый»

Яңа ел каникулларында Башкарма комитетның 80 хезмәткәре дарулар китерү буенча үзәк волонтерлык штабына килгән 270-тән артык гариза буенча эшләгән.

Фото: Марат Мугинов

(Казан шәһәре KZN.RU, 24 нче гыйнвар, Ксения Швецова). Башкарма комитет җитәкчесе Рөстәм Гафаров бүген эшлекле дүшәмбедә шәһәр халкына, COVID-19 белән авыручыларга ярдәм итүче волонтер штаблары эшенең актуальлеге кимемәве турында билгеләп китте. «Без авыручыларга ярдәм иткән һәркемгә рәхмәтлебез, ирекле ярдәмчеләребезгә ярдәм итәргә тырышырбыз», – диде ул Балалар һәм яшьләр эшләре комитеты рәисе Минтимер Ногмановның волонтерлык штаблары эшчәнлеге турындагы отчетыннан соң. Алар эшендә Башкарма комитет хезмәткәрләре дә катнаша. Җиде бәйрәм көнендә Башкарма комитетның 80 хезмәткәре үзәк волонтер штабына кергән 270-дән артык гариза буенча эшләгән.

Казанда коронавирус белән авыручы кешеләргә дарулар китерү буенча 13 волонтерлык штабы эшен дәвам итә. Беренче чиратта аларны ялгыз һәм өлкән яшьтәге шәһәр халкына китерәләр. Узган ел бу эштә 200 тирәсе волонтер катнашты.

Үзәк стадионны да кертеп, 10 волонтер штабы комитет базасында урнашкан, тагын өчесе – КНИТУ-КАИда, КНИТУ-КХТИ һәм КДЭУда. 18 яшьтән 60 яшькә кадәр булган кешеләр ирекле ярдәмче була ала.

Рецептны язганда «коронавирус» диагнозы булган пациентка даруларны өйгә китерү өчен табиб язмача ризалык ала. Алга таба рецепт системага кертелә, һәм партнер-даруханәләр дарулар буенча хәбәр ала. Бүген волонтерлар белән «Таттехмедфарм»ның 9 даруханәсе хезмәттәшлек итә. Алар волонтерлык штабларына заказның әзерлеге турында хәбәр итә, штаб җитәкчеләре әзер булган даруларны ала һәм аларны авыруларга препаратларны илтүче волонтерларга тапшыра.

«Бу эш күп санда кеше һәм техник ресурслар таләп итә, – дип билгеләп үтте М.Ногманов. – Көн саен китерелә торган даруларның саны даими үзгәреп тора. Кышын һава шартлары аркасында дару препаратлары китерү кыен, шуңа күрә беренче чиратта аларны өлкән һәм ялгыз яшәүчеләргә илтәләр». Штабларда автоволонтерлар җитми, дип өстәде Балалар һәм яшьләр эшләре комитеты рәисе. Ул искәрткәнчә, узган ел шәһәр Башкарма комитеты штабларга 20 мең сумлык ягулык карталары сатып алырга ярдәм иткән, бу исә ирекле ярдәмчеләргә ягулыкка чыгымнарны капларга мөмкинлек биргән.

Иң актив волонтерларны даими рәвештә бүләклиләр. Узган елның сентябрендә шәһәр халкын иҗтимагый мөһим эш өчен бүләкләүгә багышланган тантана узды. Иреклеләр арасында Халитовлар гаиләсе: көмеш волонтер Хрия Усмановна һәм аның кызы Алия авыручы казанлыларга 300-дән артык дару китергән.

Яңа ел көннәрендә волонтерларга Башкарма комитетының шәхси график буенча эшләүче структур бүлекчәләре хезмәткәрләре булышкан. «7 бәйрәм көнендә Башкарма комитетның 80 хезмәткәре үзәк волонтер штабына кергән 270-дән артык гариза буенча эшләде», – дип хәбәр итте М.Ногманов.

Пандемия чорында шәһәр халкына башка яшь оешмалар да ярдәм итә, аерым алганда, Гомумроссия халык фронтының «Волонтер-табиблар» һәм «#Молодежка» яшьләр оешмалары. Алар эшенә үзизоляциядәге һәм өлкән яшьтәге кешеләрне дарулар белән тәэмин итү керә, дип искәртте Балалар һәм яшьләр эшләре комитеты рәисе. «Без бергә» дигән сall-үзәк тәүлек буе +7(800)-200-34-11 номеры буенча эшли.