Акчаларын сакларга тырышып, Казанда яшәүче хатын-кыз мошенникларга 240 мең сумнан артык акча күчергән

Акчаларның бер өлеше кредит итеп рәсмиләштерелгән.

Фото: Казан шәһәре KZN.RU

(Казан шәһәре KZN.RU, 22 нче март). Казанда яшәүче 55 яшьлек хатын-кыз мошенникларның хәйләсенә эләгә һәм 240 мең сумнан артык акчасын югалта.

Зыян күрүче сөйләвенчә, гыйнвар уртасыннан башлап, ай ярым дәвамында җинаятьчеләр аңа кесә телефонына шалтыраткан. Алар үзләрен Үзәк банк хезмәткәрләре дип таныштырган һәм акчаны «куркынычсыз счет»ка күчерергә тәкъдим иткәннәр.

Мошенниклар хатын-кызга акчаларын күчерү өчен кесә телефоны номерын һәм банк мәгълүматларын биргәннәр. Алты операция белән Казанда яшәүче хатын-кыз 246 мең сум акча күчергән. Акчаның бер өлеше кредитка алынган.

Нәтиҗәдә, зыян күрүче «Гвардия» полиция бүлегенең дежур частена мөрәҗәгать итә. РФ Җинаять кодексының 159 нчы маддәсенең 2 нче өлеше буенча җинаять эше кузгатылган, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Исегезгә төшерәбез, таныш булмаган кешеләрдән шалтыратулар яки хәбәрләр килгәндә, алар белән элемтәгә керергә һәм аларның күрсәтмәләрен үтәргә кирәкми – акча күчерергә, билгесез кушымталар урнаштырырга яки интернет-заказны алдан түләргә ярамый. Мондый очракларда мошенниклык факты турында хокук саклау органнарына хәбәр итәргә киңәш ителә.

Шулай ук укыгыз

Барлык яңалыклар