Казанда яшәүче кыз, фотоаппарат сатып алырга теләп, мошенникларга 40 мең сумнан артык акча күчергән

«Сатучы» кызга, электрон сылтама буенча күчеп, үзенең банк картасы реквизитларын кертергә тәкъдим итә.

Фото: Денис Гордийко

(Казан шәһәре KZN.RU, 5 нче май). Казанда яшәүче 20 яшьлек кыз мошенникларга ышана һәм 40 мең сумнан артык акчасын югалта.

Зыян күрүче сүзләренчә, ул бушлай белдерүләр сайты аша фотоаппарат сатып алырга карар кыла. Яхшы вариант тапкач, кыз «сатучы» белән элемтәгә керә һәм килешү шартлары турында сөйләшә. Мошенник кызга, электрон сылтама буенча күчеп, үзенең банк картасы реквизитларын кертергә тәкъдим итә. Берникадәр вакыттан соң зыян күрүченең картасыннан 40 мең сумнан артык акча алына. Әмма кыз товарны ала алмый, «сатучы» элемтәгә чыгудан туктый.

Үзен алдаганнарын аңлап, зыян күрүче «Горки» полиция бүлегенә мөрәҗәгать итә. РФ Җинаять кодексының 158 нче маддәсенең 3 нче «Банк счетыннан урлау» өлеше буенча җинаять эше кузгатылган, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Искәртеп узабыз, интернет аша товар сатып алганда, товарны тапшырганчы яки җибәргәнче, алдан акча күчерүне сораган аферистлар белән очрашырга мөмкин. Халыкка товарларны бары тик тикшерелгән интернет-мәйданчыкларда гына сатып алырга киңәш ителә, алдан ук башка алучыларның бәяләмәләрен өйрәнү дә комачау итми.

Шулай ук укыгыз

Барлык яңалыклар