Гражданлык хәле актларын теркәү идарәсе җитәкчесе вазифасына сайлап алу конкурсы финалына биш катнашучы үтте

Барлыгы 24 яшьтән 53 яшькә кадәрге 40 кеше гариза биргән иде

Фото: Казан шәһәре KZN.RU

Казан шәһәре Башкарма комитетында Гражданлык хәле актларын теркәү идарәсе җитәкчесе вазифасына сайлап алу конкурсының финал утырышы узды. Соңгы этапка биш кеше үтте.

Конкурс башлану турында 13 нче ноябрьдә мэр Илсур Метшин игълан итте. Исегезгә төшерәбез, 2017 елның июленнән идарә башлыгы вазифаларын Римма Миңнуллина башкарды, соңрак ул декрет ялына китте. Шәһәр башлыгы ассызыклаганча, булачак җитәкчене идарә эшчәнлеген цифрлаштыру, документлар әйләнеше һәм казанлыларга гомер буе кирәк булган мөһим мәгълүматлар белән бәйле эш көтә.

Әлеге вазифага 24 яшьтән 53 яшькә кадәрге 40 кеше дәгъва кылды, алар арасында үзмәшгульләр, эшмәкәрләр, укытучылар һәм муниципаль учреждениеләр хезмәткәрләре бар иде. Конкурста катнашучыларның 10% ы – ир-атлар.

Кандидатларны бәяләү нәтиҗәләре буенча ярымфиналга сигез кеше сайланды. Конкурсның эксперт комиссиясен мэр җитәкләде.

Биш катнашучы финалга чыкты:

Ралия Кашапова, Татарстан Республикасында кеше хокуклары буенча вәкаләтле вәкил Аппаратының мәгълүмати-аналитик бүлеге җитәкчесе;

Ксения Марточкина, ТР Юстиция министрлыгының җәмәгать судьялары эшчәнлеген оештыру һәм хокукый яктан тәэмин итү бүлеге башлыгы;

Ольга Николаева, Казан шәһәре Гражданлык хәле актларын теркәү идарәсенең оештыру-кадрлар бүлеге башлыгы;

Елена Студеникина, Казан шәһәре Гражданлык хәле актларын теркәү идарәсе башлыгының беренче урынбасары;

Алинә Хәбибуллина, Казан шәһәре иҗтимагый үзәге директоры.

Ралия Кашапова үзенең презентациясендә гаилә кыйммәтләрен һәм традицияләрен саклауга һәм аларны үстерүгә ярдәм итү кирәклегенә басым ясады. Ул яңа өйләнешүчеләр өчен «Гаилә тормышы нигезләре», мәктәпләрдә һәм балалар бакчаларында «Гаилә белеме» дип аталган проектларны гамәлгә ашырырга тәкъдим итте.

Ксения Марточкина Казанда никахлашу өчен мәйданчыкларны киңәйтү кирәклеген билгеләп үтте һәм өйләнешүне рәсми теркәү өчен локацияләр сайлап алу буенча онлайн-сервис булдыру инициативасы белән чыкты.

Ольга Николаева Гражданлык хәле актларын теркәү идарәсендә инде гамәлгә ашырыла торган проектлар хакында сөйләде, шулай ук структур бүлекчә тарафыннан күрсәтелә торган хезмәтләр һәм үткәрелә торган чаралар турындагы мәгълүматтан һәркем файдалана алу мөмкинлеген үстерергә тәкъдим итте.

Елена Студеникина чыгышының төп концепциясе – «Казан – бәхетле һәм нык гаиләләр территориясе!». Ул программаны гамәлгә ашыру өчен әлеге эшкә яшьләр оешмаларын һәм иҗтимагый оешмаларны җәлеп итәргә кирәк дип саный. Алар гаилә кыйммәтләрен популярлаштыру үрнәге булачак.

Алинә Хәбибуллина идарә имиджын булдыру белән бәйле чаралар тәкъдим итте. Ул шулай ук Гражданлык хәле актларын теркәү идарәсе хезмәткәрләрен гражданнар белән үзара хезмәттәшлекне, җәмәгать чыгышларын һәм стандарт булмаган ситуацияләрне эшләп карау өчен виртуаль чынбарлык технологияләре ярдәмендә укыту идеясе белән чыкты.

Конкурста катнашучыларның барысы да бертавыштан процессларны цифрлаштыруның, идарә имиджын булдыруның һәм кадрлар потенциалын формалаштыруның мөһимлеген билгеләп үтте.

Шулай ук укыгыз

Барлык яңалыклар